佘詩曼最近有份主演嘅大陸劇《延禧攻略》，上星期喺大陸播出，短短5日瀏覽量已破3億，反應相當唔錯，雖然阿佘喺劇中演嘅嫻妃只係配角，但就相當突出，首先佢個角色設定係23歲，畀阿佘實際年齡細足20年，但唔少網民都覺得阿佘駕馭到，做番廿幾歲都仲得，而阿佘個角色會愈演愈奸，對視后嚟講當然係一大挑戰。
今日《蘋果》收到可靠消息，阿佘因為《延禧攻略》令佢好似打咗支強心針，好想自己試吓做埋製作人搞一部類似《延禧攻略》嘅網劇，結果古天樂方面好有興趣投資，同阿佘傾過之後，決定簽埋阿佘做旗下藝人，幫阿佘接工作之餘，仲投資埋阿佘擔正做主角及兼做製作人嘅古裝網劇，據知日前阿佘已經秘密同古仔公司天下一簽約，準備喺演藝工作大展拳腳，同林峯、宣萱繼無綫之後再做同事。
由於古仔公司有好多做幕後嘅人材，阿佘有佢哋帶住去做製作，自然安心好多！阿佘97年當選港姐季軍入行，由初初畀人話雞仔聲做到兩屆視后，先後喺06年《鳳凰四重奏》同14年憑《使徒行者》兩奪無綫《萬千星輝頒獎典禮》視后，演技愈嚟愈掂。
至於阿佘當年出道之後一直做無綫親生女，11年離開無綫兩年之後，再簽畀無綫嘅合資公司TVBC，直至16年阿佘約滿後回復自由身，o依家佢簽畀古仔，佢同古仔、宣萱呢個組合，正正係《刑事偵緝檔案IV》合體！
《蘋果》今日聯絡阿佘，向佢求證簽約古仔公司一事，但暫時未有回覆。
(蘋果日報)
