兩個都係白羊座，佢好風騷，甜到漏咁講：「白羊座係衝動派，幾好呀，我應該冇揀錯未婚夫，因為大部份佢做，細節嘢佢同我安排好，算係開心去迎接婚禮。。。」
真係峰迴路轉。
卓韻芝前年8月在棟篤笑騷上忽然宣佈出櫃有女友，但去年11月卻又爆出同猛男拍拖，今年初阿芝出新書《峰迴路轉》中宣佈婚訊，當時佢接受本報訪問時話：「自己寫書嘅，都希望用一本書嚟話畀大家聽開心消息，未正式結同落實結婚日期，但就有人求咗婚，有人應承咗。」之後更直認閃婚：「我識咗佢3個月，但第一日佢就求婚喇。」未婚夫仲親自整求婚戒指，以表誠意。
阿芝雖用「閃電俠」暱稱未婚夫，但佢好快被起底叫梁子賢，任職電影美術，佢哋婚期訂咗今年9月15日，喺中環外國記者會舉行，婚後阿芝繼續同88歲、相依為命嘅婆婆一齊住，早前婆婆見暈入院，康復出院，準女婿陪阿芝接佢出院，三人行好有愛。
距離婚期仲有一個多月，阿芝同未婚夫開始籌備，佢哋近日仲入紙登記結婚，根據申請書上顯示，梁子賢報稱做art director，現年34歲，細過阿芝5年，兩個都係3月生日，同係白羊座，姊弟戀開花結果，佢哋報住地址係天后興發街（即阿芝寓所），原來已係同居關係。
今日《蘋果》打畀準新娘阿芝，問佢婚禮搞成點？佢好風騷，甜到漏咁講：「幾好呀，因為得到各位朋友、前輩鼎力支持下，婚禮搞得非常順利，依家籌備兩部份，有一晚擺酒招呼親戚，另一日同我哋啲後生朋友cocktail reception。」
阿芝話籌備過程好開心，笑言：「我應該冇揀錯未婚夫，因為大部份佢做，細節嘢佢同我安排好，算係開心去迎接婚禮。」原來阿芝同未婚夫都同係白羊座，阿芝話：「白羊座係衝動派，一意孤行，對生命好有熱情，好有魄力，幾似佢，幾似我。希望將來有乜嘢事、大家唔同意見時，一個衝動，一個唔好衝動啦，唔好咁白羊。其他時候衝動好喇！」但其實兩個白羊座結婚，已經係衝動啦………佢都認：「我哋一齊結婚，都幾衝動喎，暫時相處之道學到呢個階段。」婚禮阿芝話呢排籌備talk騷，所以未婚夫就趁空檔負責搞婚禮，「朋友都有幫手搞，搵頭紗，搞婚前派對，今次用一個婚禮，體驗到大家對我嘅關心同愛。」
（蘋果日報）
