劉佩玥（Moon）同林芊妤（Coffee）等今日喺銅鑼灣出席meitu全新手機發佈會，懷孕6個多月嘅Coffee喺現場兩次撞到地上嘅擺設，差啲跌親，好彩身邊嘅Moon即時扶住佢，有驚冇險！Coffee話：「唔緊要，跌親冇嘢嘅，我平時都好論盡，今日着高踭鞋出街，老公即刻大嗌『吓！』跟住我就好快出咗門口啦。」問到佢平時係咪咁唔聽話？佢就話：「阿Moon又靚又瘦又高又長腿，我唔着高踭鞋就成個小矮人咁，我都係貪靚嘅。」
Coffee真係好大膽！嚟緊佢就出發同老公去歐洲自駕旅，揸住架車去德國、法國同埋意大利，仲會去20日，佢仲話：「有朋友問唔怕『戥』咗個bb出嚟？啋！唔怕啦，我都係坐喺車入面，今次酒店都未book，都係backpack探險，我覺得小朋友出世之後，就冇咗自己人生，唯一因為胎盤太低，阻住出世，所以會開刀，所以今次都唔能夠太操勞，會去睇下建築物風景，返嚟嘅時候就8個月㗎喇，仲有一個月安胎，其實自己喺香港會仲曳，噚晚仲跑步跑咗5k，開頭諗住陪老公去跑，我自己散步，點知覺得好悶所以就慢跑。」
另外，阿Moon低胸裙性感現身，提到寫真銷量，阿Moon話：「唔錯呀，有朋友想要都留唔到畀佢哋，今個禮拜仲會公佈海外訂購，今次印咗3000本，依家剩反幾百本，爸爸嘅朋友同埋仔女想買，我都要叫佢哋去書局同埋便利店買，呢一個係一個開心事，係好滿意，一開始冇諗住係商業，扣除成本之後我會同班幕後同我出生入死嘅朋友慶功，食牛雜，講笑啫，其實係食飯慶祝，佢哋鍾意食日本嘢，開心最緊要。」
問到佢點解唔加印？佢就話：「我諗住係限量發售，今次銷情咁好，已經諗定下一次，會有part 2。」問會唔會加多啲性感？呀Moon就話：「今次都唔係性感行先，係文字同埋寫自己嘅嘢，大家都咁鍾意，真係好感動呀！希望藝人出書唔係sell性感，今次嘅成功，大家接受，亦都畀咗個仙氣女神呢個咁好聽嘅名我，唔賺錢都賺到滿足感。」
至於問到同佢同屆嘅港姐冠軍陳凱琳嘅婚禮，阿Moon就話：「公報咗未㗎？我唔知呀，依家都等緊。」會唔會恭喜對方雙喜臨門？佢就話：「唔知係唔係雙喜臨門，但係有喜事就好開心，身邊嘅朋友結婚同埋生仔，都會係開心事。」
(蘋果日報)
