寶馬香港50周年「Joy of Excitement」啟動儀式暨《職業特工隊：叛逆之謎》香港區首映，今晚喺海運大廈舉行，圍觀市民迫爆兩層商場，大會就請嚟王浩信擔任主禮嘉賓，其他出席藝人還有林敏驄、河國榮、Donald、歐錦棠、陳嘉倩、何傲芝、蔡潔、Ben Sir等。
活動MC楊洛婷表示，自己都係愛車之人，佢指自己由16歲考到車牌開始就揸到o依家，楊洛婷話：「我都揸得幾狼，有時老公（Tim）都會驚，自己大學嘅時候都有曳過，嗰陣車速都有百幾，揸得幾快，o依家有個女就好乖喇，安全最緊要，我亦一早安排晒啲car seat畀佢坐。」
問佢係咪希望以後可以同囡囡一齊揸車？佢就話：「係呀，我o依家成日都畀玩具車佢玩，playgroup又有玩具車畀佢爬吓爬吓咁，阿女10個月大，好鍾意玩新事物，我細佬就嚟結婚，有日同阿囡試裙嗰陣，佢見到自己着住條裙仔就笑到見牙唔見眼，仲企埋塊鏡度錫自己，我肯定個女會貪靚過我，見到Daddy彈結他唱歌，佢又會手郁郁口郁郁咁跟住學。」
(蘋果日報)
