林夏薇今日喺觀塘apm出席「數碼運動潮人學堂」記招，薇薇堂哥林峯被爆同27歲大陸女模張馨月打得火熱，今日問到薇薇有冇見過堂哥新歡，佢口快快答：「有見過。」之後發現自己口快講錯嘢，就兜番話：「緋聞女友就知，新女友就唔知嘞，緋聞女友就喺聚會上見過一、兩次。」
問到新歡張馨月係咪已經融入林家？薇薇就話：「都唔係太多聚會嘅，同佢都有傾偈，但都唔係太多見面。」問到對對方印象如何？薇薇話：「我覺得大家相處，所有嘢都係由相處開始，冇任何覺得，大家好少接觸。」佢就唔評論堂哥同新歡襯唔襯，不過就大讚對方靚女！
至於今日係離巢無綫後第一個活動，薇薇就話唔捨得舊公司，有啲唔慣，不過就多咗時間休息同處理家事，而佢亦透露即將有投資新項目，仲被老公迫佢返工，佢話：「先生要我面試，跟佢返公司，我一定由低做起，有老公咁好嘅師傅教我投資，依家活動會照出，係暫時唔拍劇。」
提到剛度過結婚3周年，問佢收到咩禮物？夏薇話：「食咗一餐好浪漫嘅飯，我不嬲對禮物都唔要求高，係簡單兩夫妻，依家多時間陪老公。」問到下一步係咪努力造人？佢笑話：「唔係下一步，係隨時，依家調理身體先，之前撞車，依家都有啲痛，慢慢練番肌肉，人太瘦唔得，有睇中醫，之前冇乜休息，要食多啲嘢。」
(蘋果日報)
