近日盛傳與女友陳凱琳雙喜臨門嘅鄭嘉穎，其實早排捲入過一單事業風波，有指佢同謝天華等人合演嘅大陸網劇《套路》，傳因製作公司在個多月內豪花6,382萬元人民幣（約7,800萬港元），卻僅拍出不到七集的劇本素材，並拖欠劇組工作人員薪金數十天至兩個月不等，資方突然對內宣佈解散劇組停拍，一度傳出劇組人員滯留泰國，但酒店費用無人支付。
鄭嘉穎 （資料圖片）
謝天華 （資料圖片）
點解提番呢件事？係因為今次輪到《套路》個導演林淑貞今日發出聲明，指自己喺本月16日清晨約6時，佢喺海口某酒店熟睡期間，突然感到有人壓喺佢身上並摸其胸部，林淑貞指對方係一名只穿黑色內褲嘅陌生男子企圖性侵自己，林淑貞稱基於本能，奮力打該男子及趕對方出門。
其後在酒店人員協助下報警，一行人到了海口巿公安局濱江派出所，指涉案男子為白姓海航受訓飛機師，當時是從隔籬房、18樓高嘅露台爬去林淑貞房間，該男子自稱酒後糊塗犯錯。
林淑貞在聲明中指，當日整個報案過程，公安都冇筆錄或錄影，而白姓男子嘅朋友，以及其海航嘅上司都有到，林淑貞指公安力勸佢和解。林淑貞稱由於佢係香港人，對中國大陸嘅執法及司法制度唔熟，就話要考慮幾日。後來林淑貞咨詢過朋友嘅意見後，決定先立案，先再決定起訴定和解，於是喺19號再到公安局立案。
林淑貞指海航高層亦有勸和解，指因培育一個機師成本好大，而公安又話林淑貞亦有打白姓男子，如果林淑貞堅持告白男，佢哋都會告林淑貞襲擊罪。
林淑貞喺聲明結尾話，自己要將件事公開，唯一嘅訴求係希望有關方面依法處理事件，彰顯公義，而佢仲話：「我對祖國的法治仍有信心。」
呢套劇嘅另一個導演劉國昌今日凌晨回覆傳媒時，亦承認確有此事，佢話：「劇組制片有協助林導前往派出所報案，亦參與調查案件，涉事為海航受訓機師，案件仍在進行中。」
據知，林淑貞曾參與過不少大型電影製作，如成龍的《紅番區》、李連杰的《投名狀》及《功夫之王》等，和不少巨星合作過，是資深的電影工作者。
（綜合報道 / apple daily / on.cc）
