陳貝兒上月出發去為大台拍攝節目《嫁到這世界邊端2》，尋訪異鄉人妻感人古仔，佢呢次行程長達40日，要去瑞典、法羅群島、波蘭、希臘同土耳其合共5個國家，全程總共要坐19程飛機，諗起都頭痕。貝兒日前去到最後一站土耳其，即係行程第37日，倒數就可以返嚟，點知噚日佢頂唔順病咗要入院。
今次行程，貝兒同攝製隊全程執晒又凍又熱地方嘅行李，塞爆兩個篋，隨行共5人攝製隊外景，全團三男兩女，貝兒係冇助手照顧，即使出鏡妝頭、服飾全部部由佢自己搞掂。貝兒每到一站都打卡報平安，點知今午就喺facebook貼咗吊鹽水相，異鄉倒入院，認真慘慘豬。佢留話言：「口裏說頂得住，但身體卻很誠實…..#多謝土耳其醫生護士悉心照顧#多謝土耳其人妻夜媽媽車我入醫院#多謝關心而家好好多#只差一點點#繼續加油。」
據知因為每站行程都好緊密，壓力大，唔夠瞓，加上土耳其氣溫高達41度，噚日仲全日外景，真係收買人命，貝兒拍攝中段已頭暈不適，但佢唔敢講出嚟，怕影響進度，畢竟佢哋進入最後三日倒數狀態，佢諗住頂硬上，但半夜拍完都係好唔舒服，工作人員就帶咗佢去當地醫院睇急症，醫生要佢立即瞓床吊鹽水。因為拍攝進度緊密，貝兒吊完鹽水漏夜又要出院，佢堅持今日頂硬上開工。
貝兒呢次去到第三站法羅群島，嗰度係偏遠郊區，山區低溫十度以下佢都撐到，但趕行程，成個月唔夠瞓，佢日前訪問已吐苦水：「行程好密，有啲攰。」點知佢去到希臘天氣開始炎熱，成個月外景chur爆，去到土耳其甚至高溫到41度，外景下乾煎。其實事發前，貝兒都喺Instagram嘅限時動態貼出拍攝相，其中一張係當地氣溫圖。
貝兒今日回覆傳媒時，氣弱游絲：「我嬲自己咁都捱唔到，土耳其天氣太熱，外景有啲暈，仲差三日咋，我唔想阻礙拍攝進度，點都要撐埋佢。」貝兒話噚晚半夜入院，吊完鹽水，今日凌晨就出院返咗酒店，佢再抖吓就出動繼拍攝工作。佢話：「仲有兩日，我點都拍埋佢，今次好多謝團隊照顧我，冇事，大唔使太擔心，多謝關心。」
（on.cc）
