今年二月喺新書宣佈「我要結婚了，就跟你。」同未婚夫9月舉行婚禮，雖然結婚係喜慶事，但佢呢日喺社交網發文爆「前前前度」對佢嘅婚事感不快！
今日佢帶住新作《峰迴路轉》喺書展舉行分享會，問到佢未婚夫「閃電俠」梁子賢會唔會就係佢寫作嘅靈感同泉源，卓韻芝（阿芝）話：「都有諗吓會寫佢嘅嘢，但係就考慮當中，有啲嘢都唔知可唔可以公開寫。」
界乎係可唔可以公開寫嘅，阿芝指乜嘢呢？佢話：「例如噚日因為婚訊嘅關係，得到前前前度打嚟表達醋意，我聽完就梗係覺得好開心啦，覺得咁厚禮呀！都有將呢件事問番未婚夫，問佢介唔介意（將件事講出嚟），但佢個回覆係『你可以講任何嘢』，呢個答案真係好高分。」
（卓韻芝facebook）
卓韻芝同未婚夫梁子賢將於9月舉行婚禮。
再問到會唔會將一啲結婚嘅經歷，集合成書去寫一本書出嚟，阿芝就話：「其實我10月會有個talk騷，到時可能會講及少少呢啲嘢啦，同埋會有笑料嘅。反而自己好想出一本書係關於婆婆嘅，因為自己結婚，會有好多親友由外地飛嚟香港（飲喜宴），四方八面咁嚟，想趁呢個機會去影一張全家福，因為阿婆亦都好少機會見到屋企咁齊人，如果真係影到呢一張相嘅話，我想再寫一本關於阿婆嘅書，好似《今日阿婆金句》呢一本書呢…能夠為阿婆寫一本咁樣嘅書，出得一本係一個福氣。」
卓韻芝與婆婆 （資料圖片）
阿芝平日不時讚婆婆寫字好靚，問佢會唔會搵阿婆幫佢寫喜帖，阿芝笑言：「佢好慢㗎喎，又驚大家睇唔明，算啦，正經啲，都係循正途印番張帖就好喇。」
卓韻芝到書展宣傳新書
唔知婚禮會唔會請商台前同事Donald、森美小儀呢？（資料圖片）
(apple daily)
