48歲嘅鄭嘉穎同27歲陳凱琳(Grace)拍拖三年，近日被爆下月結婚，咁突然，令外間都有唔少揣測。據《蘋果》收到嘅消息，陳凱琳同嘉穎結婚結得咁急，係因為Grace有咗BB，據聞未夠3個月，所以唔可以講得住。今日大台搞咗個大型活動，全公司藝員出席，但偏偏就唔見陳凱琳出現。另外，原本今個月陳凱琳要返大陸幫無綫拍嘢，但竟取消晒，呢段時間佢停止晒所有工作，似乎因為BB未夠3個月，所以呢段時間要專心安胎。
唔單止咁，嘉穎有份主演嘅電影《L風暴》，原本下個月排好晒好多宣傳工作，但嘉穎突然要攞期結婚，所以打亂咗宣傳工作，而佢點解突然咁急攞期結婚，唔等完成晒手頭工作結婚，亦因為女友有咗BB關係。
據知，嘉穎同陳凱琳婚禮喺下月中喺峇里一間海邊酒店舉行，過往好多藝人都選擇峇里舉行婚禮，貪當地碧海藍天環境又靚又浪漫，最重要係夠晒私隱，好似林心如同霍建華、陳敏之同老公William、許志安同鄭秀文、劉愷威同楊冪、鍾鎮濤同范姜、侯佩岑同老公黃伯俊、關心妍同老公楊長智等等。
（資料圖片）
《蘋果》都有向當時人求證，問係咪奉子成婚？嘉穎都係一貫答法﹕「我都想，但唔係囉。」而Grace回覆傳媒時就話﹕「我唔知邊個咁有創意，不過唔係真，真係唔想再回應，呢一刻真係需要私隱同空間。」
（apple daily）
