「多女公」藝人林盛斌（Bob）今日現身書展為太太黃乙頤（Pearl）撐場，期間影大合照時，未夠一歲的Jaye氣力為之驚人，人仔細細就可以拎起本大過自己塊面嘅書，實行以「行動」力撐媽媽！未幾，記者要求放下新書再合照時，Bob貪玩一手從囝囝手上強行扯走本書，嚇到Jaye即時爆喊，要Pearl抱開「定驚」，Bob則充滿內疚感想氹番囝囝，當Jaye被安撫後重新埋位時全程都怒睥爸爸，仲趴落Pearl身上撒嬌，場面搞笑！
問到為何只帶同孻仔林道申（Jaye）到場？Pearl解釋說：「三個女同婆婆依家喺加拿大多倫多探家姐，唔想佢哋等埋我呢個活動而玩少幾日，但細佬夜晚都要我陪瞓，所以就等埋我下星期日先飛。」她續指今次是囝囝第一次出埠：「平時出街都會帶齊佢哋，出街唔係啲咩特別嘢。」
Bob則表示每年暑假都會一家去旅行，今年都唔例外，希望抽到時間，又不忘大讚太太為新書出花了不少心力，所以專登推Job撐老婆：「書入面都係參與咗少少訪問，老婆係超人媽媽，佢出書都希望可以鼓勵其他媽咪。」
Pearl就話出書契機是身邊朋友都希望自己分享湊仔心得。問到可有送書給剛宣布榮升爸爸的好友王祖藍？Bob即刻話當然有，要鼓勵、支持佢同李亞男：「一知道佢有BB就即刻Send Message恭喜佢，呢一年都成日叫佢快啲生賺夠啦，始終有個家庭、有BB係唔同，即使喺內地工作有幾如火如荼，有埋家庭係圓滿啲，但點知呢幾個月無提就即刻有，仲諗住傳授生仔秘方畀佢，點知佢話自己教自己！」
Jaye個樣係幾咁深深不忿。
（on.cc）
