王子邱勝翊同Stephy鄧麗欣年紀相差五年幾，加上仍然有唔少fans希望Stephy同方力申復合，所以最初傳出王子Stephy戀事，大家都唔信，而且佢哋以前仲係同公司，所以可信性本來都唔高，點知……
仲係熱戀期，自然愛得癡纏，王子明明去咗日本工作，都秘密再度來港見Stephy，見少陣都唔得。Stephy早前於公開活動上已承認戀情，之後王子亦於社交網認愛，步伐都算一致啦。女方接受周刊訪問時就謂，大家都係成年人，亦都覺得戀情想低調都低調唔到，咁Stephy亦唔想講大話，所以決定坦然公開。
雖然係姊弟戀+異地戀，不過佢就好有信心，全賴先進科技，溝通唔難；至於年齡問題，Stephy話，2018年嘅今日，早已沒有年齡界限。日前方力申出席活動時，表示數月前已知舊愛同王子一齊，仲見過幾次，見面時亦不覺尷尬。
但有個人係比小方更早知，嗰個就係鄧媽媽，Stephy話唔想媽咪睇到報道至知個女有拖拍喎。至於點解識咗咁耐先拍拖？Stephy話係緣份使然。但總之，一句到尾，佢係想低調——因為以往嘅經驗，所以，佢想好好保護同王子呢段感情。不過，就咁嘅，Stephy同小方結束十年情之時，有傳係女方事業心重，有目標有理想，但男方就安於現狀，雙方漸生距離。
如今另一半已換上係王子，34歲嘅Stephy一方面想保護戀情，但亦不忘提醒自己：唔想將感情放得太重。想專注工作，同埋，唔想影響大家嘅工作。依家，Stephy形容，係王子事業攀升期，都係嗰句，希望大家專注工作。咁，之後大家嘅路會點行呢？
(蘋果日報)
