下月踏入49歲嘅鄭嘉穎與比自己年輕22年嘅陳凱琳(Grace)拍拖3年，當年兩人因為拍攝無綫劇《殭》撻着，起初不被睇好，有指女方家人好反對，但兩人排除萬難，越來越恩愛。
有報道指鄭嘉穎已求婚成功，並已定於下月去海外舉行小型婚禮，只邀請十多位至親友，當中包括嘉穎拍攝《鐵馬尋橋》幾位好兄弟馬國明、林子善、黃嘉樂及「阿妹」唐詩詠等，相信Grace一班姊妹陳嘉寶、賴慰玲等亦獲邀請出席見證兩人婚禮。之後會再喺Grace成長地方加拿大補擺喜酒。
《蘋果》今日向嘉穎同Grace求證，兩人似乎已夾定口供，嘉穎話:「我都想，哈哈哈哈哈！多謝大家關心，我哋兩個感情好好，至於結婚呢，有消息再通知大家！」
而Grace亦未有否認婚訊：「多謝大家關心，我哋兩個感情好好；至於結婚，有消息再通知大家！」有指嘉穎好鍾意小朋友，由於年紀唔輕，一直都好想快啲迎娶Grace過門；而Grace嘅好姊妹賴慰玲去年亦成生咗BB，所以Grace亦唔太拒抗27歲就做少妻同嫩媽，計劃婚後立即造人生B，為鄭家繼後香燈。
(蘋果日報)
