又走一個。
通常用親呢個term，都大概估到，走嘅，唔係嗰種「走」，應該就係，又有無綫藝人離巢。
如題。今次係同無綫合作十二年嘅Jason陳智燊。將為人父，噚晚佢毅然宣佈此重要決定。「返來香港之前我猶豫咗好耐，一個人自己離開屋企，追求一個唔知可唔可以實現既夢…我好幸運，有一個好支持我嘅家庭，阿爸阿媽既鼓勵，我哋四兄弟之間嘅扶持，令我更有信心去追夢。」
「返到來香港我都一樣幸運，加入TVB之後得到好人嘅愛戴。樂小姐不斷帶當時嘅我出席活動，不停搵機會俾呢個新人。Sandy（余詠珊）亦都俾咗我好多做主持嘅機會，等我再深入了解呢一行。「多謝珍姐（曾勵珍），多謝你多年來嘅栽培，多謝你咁多年來一直提醒我要做好自己，多謝你令我實現到我演戲既夢想。」
「我要多謝所有合作過既同事，我喺TVB呢個家庭可以過得咁開心全因為你哋，最唔捨得就係你哋….」
「支持過陳智燊嘅人，衷心感謝你哋嘅鼓勵同愛戴。我會加油，我會繼續做好自己！」其中一個hashtag係#NewChapter之前睇過鍾嘉欣、岑麗香喺社交網發表嘅「告別TVB的信」，對陳智燊這一篇，已經不感意外……Sigh。陳智燊仲有另一個post，係感謝雙親、以及代為照顧雙親嘅好友，仲有懷孕七個月嘅太太宋熙年。他特別寫道：”@RahRahSong starting a family with you has been the most precious thing in my life. Thank you for the confidence and motivation that you inspire in me. You give me strength to pursue my dreams, to be a better me, to make you and our son proud.It’s gonna be exciting!”好感動！！！
自細喺英國長大，父母在當地開餐館嘅陳智燊，在倫敦大學畢業後，03年返港，加入娛樂圈，06年加入無綫電視第20期藝員訓練班，最初被派到明珠台做節目主持，至近年開始拍劇，「入屋」之作包括2011年處境劇《誰家灶頭無煙火》，翌年拍《幸福摩天輪》坐正做男一，可惜陳智燊似乎生成一條「二奶命」，始終上唔到一線，而且有段時期仲幾黑仔，有份演出劇集如《三個女人一個因》、《超能老豆》都無啦啦被抽起Delay出，搞到陳智燊無晒心機，故近年來同老婆宋熙年疊埋心水做Youtuber，成功吸客，殺出新血路。俾心雞呀陳生陳太！
(蘋果日報/on.cc東網)
