富豪「大劉」劉鑾雄一向出名好火，今日67歲生日他鬧起人上來依舊中氣十足。大前日他帶同太太甘比及一對仔女到銅鑼灣希慎廣場閒逛時，跟o靚模許珮榆（Diva）發生爭執達十分鐘。起因是大劉指Diva險撞到囝囝仲學，更形容對方為「整容怪物」。Diva受訪時重申沒有撞到對方，對於被指整容感到傷害。大劉昨直認自己肉緊，更怒斥：「電梯意外會死人！」
城中超級富豪「大劉」劉鑾雄，早前經歷換腎大手術，以為已經收起過往的霸氣。不過讀者傅先生透過本報「爆相爆片」，指大前日在銅鑼灣希慎廣場，見到大劉跟一名少女發生爭執。該名少女昨日證實為模出身的許珮榆（Diva），前年曾參加ViuTv選美真人騷的《美選D.n.A》。
昨日再有本報讀者李小姐爆料，表示她目擊事件，並詳述事件始末。據李小姐稱，事件起點是在扶手梯開始，當時甘比拖着囝囝仲學，囡囡秀樺則站在前面，戴着口罩的大劉壓尾，在三母子後面。不過，Diva突然攝在大劉跟甘比中間，跟前面的甘比只有三至四吋距離。李小姐形容Diva在扶手梯上忙於篤手機，未有捉實扶手。身後的大劉忍不住出聲說：「姐姐，好心你唔好掛住睇手機啦，好危險㗎，撞親人點算？」少女即時反唇相向：「點會？我睇緊路，點會跌親？」李小姐覺得由於Diva就集在大劉一家中間，所以作為男主人的大劉特別緊張。一聽到Diva這樣說，大劉即扯火並厲聲問：「你點睇路呀？你睇住部手機！你知唔知幾多意外？而且仲會整到其他人，你有冇諗過撞到人點算？如果我老婆仔女整親，係咪你賠先！」
據知，Diva當時認不出與她對罵的男子就是大劉，認得之後，女子即反擊：「咁有善心，就積吓福！係咁喺度鬧人！嘥啲時間做有意義嘅嘢啦！」所以就爆出大劉說：「積你個福！積你老母！佢（子女）受傷係咪你賠呀？」大劉又再爆：「邊個叫我話緊你，仲係咁嘅態度？」又就其樣貌作出批評，女子馬上澄清：「我冇整容！如果我證明我冇整容，你賠番幾錢畀我！」兩人爭執達十分鐘。
當事人Diva昨日以短訊回覆本報，重述事發經過，她重申完全沒撞到大劉的兒子：「嗰日喺希慎有fans認得叫我影相，又叫我加佢fb。加完之後，我攞住部電話行上電梯。跟住有個阿叔係度鬧我，話我做乜攞住個電話『做乜喺度攞住部電話、喺度望電話』，仲要語氣極度惡劣。」Diva反問攞電話跟對方有何關係時，該位「阿叔」說：「點解唔關我事呀，你撞到我個仔……」Diva強調跟前面的小男孩（仲學）有兩至三呎距離，但對方越鬧越過份。她說開頭並不認得對方是誰，還叫他不要勞氣，直至見到甘比叫：「爸爸唔好嘈」，才知道是大劉。
Diva表示言談間有叫大劉不要亂鬧人、積口福，他聽完後更嬲話找人打我，她說：「就算佢係有錢人都要講，我都冇撞到佢個仔，為啲冇發生嘅嘢而鬧我。我唔會因為佢係大劉而畀面佢囉，如果真係撞到你個仔，我一定會say sorry，咁但係冇吖嘛。見你靚女啲，就話你整容怪物，你講完我唔鍾意，呢句傷害到我，咁去驗囉，我講到如果我冇整容，你賠錢畀我呀。」對於今日67歲生日的大劉，Diva祝他「身體健康」，又提議他返自己的商場The One逛街。
大劉昨晚接受本報獨家電話訪問，他澄清道：「我開頭唔係鬧佢，係好好聲氣嘅。我話『姐姐，你左手拎電話、右手篤手機，唔睇路，好危險，好易發生意外撞親人。』」他主要是擔心對方會令仔女有危險，兩人因而發生爭執。至於罵對方為「整容怪物」，大劉直認不諱：「我當時嬲得滯，我睇佢個樣都唔止整容一次啦！網上傳聞話佢做過舞女、生過仔，我唔知真定假，唔關我事，但我絕對相信佢整容係真嘅，我用肉眼睇，估佢整容整咗N咁多次！」
大劉受訪時又承認怒從心起，而說出過過份的說話，至於Diva受訪時稱大劉怒從心起，她說：「佢仲嬲，仲話搵人打我。」大劉解釋說：「當時大家鬧緊交，一時之氣，梗係亂噏，邊得閒打佢？盞益咗佢！」又稱：「我家咁肉緊，係因為呢啲電梯意外成日發生，係真係會死人，所以我先會話佢！」
(蘋果日報)
