楊思琦今日到新城電台接受訪問宣傳佢嘅首本寫真《MISS SZEKI 2018》，囡囡卓穎亦有陪媽媽一齊現身，思琦表示寫真推出兩日，得到好好嘅反應：「好多謝大家支持，有啲地方已經賣斷市，書商係有加印嘅諗法，如果就最好。」思埼話書展當日聽到好多人讚賞，問到覺唔覺得自己本寫真重受歡迎過一眾靚模？佢話：「唔好咁講，其實只係諗住趁青春留倩影。」
除咗留倩影，思琦妹喺寫真入面仲送咗個彩蛋畀大家，就係提到原來同李嘉欣有親戚關係，嘉欣係佢姑媽嘅姨甥女，思埼話：「其實係當時出版商問我有冇一啲特別事可以同大家分享，我嘅生活一路都好透明，好多嘢大家都知道，於是就諗會唔會有啲嘢係大家唔知呢？其實呢樣喺我哋屋企人當然唔係秘密，只係大家唔知之前亦都冇特別講。」咁喺同大家分享之前，有冇事先諮詢姑媽？思琦話：「咁又冇同佢講過，其實我哋雖然係親戚關係，但平時都比較好少見。」咁今次公開，怕唔怕嘉欣唔鍾意？佢話：「我唔猜測啦，冇咁嘅需要。」
今次寫真咁受歡迎，會唔會吸引到更多人向你問價？思埼話：「都唔係淨係出寫真先有人問啦，我都唔得閒留意，唔講呢啲啦。」佢又透露囡囡今日先首次睇完成本寫真，咁囡囡有咩反應？佢話：「佢咪不停話好靚好靚囉。」未來會唔會考慮再影多輯？思琦話：「未知，做好今次宣傳先，到時再算。」
另外，思琦今日喺商台嘅錄音訪問中就提到自己對愛情仍然有憧景。「如果可能嘅話、又有適合嘅人、時間，每個人都想，結一次婚都好正常，我未結過呀嘛，但都要睇遇唔遇到，我都仍然相信愛情嘅。」同時亦開出擇偶條件。「希望成熟啲，一來要感覺，二來要錫我、我屋企人，（即係之前嗰啲唔夠錫你？）唔係，最緊要相處到、溝通到、真誠…」
至於使唔使事前畀囡囡過目，佢就話唔使：「大人要覺得啱唔啱之後先再決定，圈內、外都冇所謂，結過婚都冇乜問題。」
(蘋果日報)
