宣佈全面復出嘅梁洛施，今日到中環畢打行出席Clé de Peau 「鑽光水凝氣墊粉底」發佈會，一身白色套裝的梁洛施聯同CoCo （蔣怡）及周汶錡出席。雖然已有一段時間未有開工，但梁洛施面對傳媒時依舊反應敏捷，轉數極快，主動同傳媒打招呼，態度親切仲好健談添！
梁洛施笑言自己都係一個獨立女性，所以需要工作，但三個囝囝會唔會好黐身影響工作？佢就話：「唔會，佢哋都大喇，八九歲，開始大個，好似大人咁有自己嘅朋友。之前佢哋都有帶埋啲朋友返屋企睇戲，我就播《盜墓迷城3》俾佢哋睇，佢哋啲同學見到我，都話：『呢個係你媽咪喎！』佢哋話係呀。」「佢哋（囝囝）都覺得好驕傲，話媽咪開心，佢哋就開心，叫我接多啲嘢做，我都會接多啲戲，或者接多啲類似超人片，佢哋都好proud of我。」又表示依家傾緊幾部新片，好快就會公佈。
至於想演乜嘢角色，梁洛施就話想演多啲cool嘅角色：「佢哋都成日喺屋企叫我做魔鬼角色0架！」係咪因為平時家教嚴呢？佢話：「其實我好玩得0架！」拍戲會係梁洛施復出嘅第一個project，第二個就係綜藝節目，會否係親子騷？「唔會，唔想牽涉小朋友。小朋友唔會曝光，只係自己鍾意玩，想參加綜藝節目。」有冇底線？「總之好玩就得！」
再追問是否與李澤楷達成共識不讓小朋友出鏡？梁洛施稱：「私人嘢唔答。」上月梁洛施30歲生日，月底就係一對孖仔8歲生日，咁一家人如何慶祝呢？梁洛施反問：「乜你哋冇睇我個ig咩？我好潮0架，我有喺ig同fans 分享0架。」但囝囝個樣用公仔圖案遮晒喎，佢又反問大家 :「乜你哋唔覺得好得意咩？」再問是否ig都不會讓兒子亮相，梁洛施表示：「你哋都有影到啦。」
去年Isabella被影到和中年四眼男拍拖食飯兼咀嘴，昨日問她感情狀況，她依然封口不談：「呢啲唔答喇！」問她會否在30歲新開始找一個伴，她便耍太極謂：「30係年齡嘅數字，佢哋（囝囝）咪係我個伴囉，係終生朋友加囝囝。」囝囝沒催促你拍拖？她笑說：「佢哋成日叫我拍乜拍乜，叫我拍戲囉！」
(蘋果日報)
