宣佈懷孕4個月：「老婆有咗兩個幾月先知，話說4月底時，我哋全家去韓國玩，囝囝上機前猛話好期待坐飛機，咁我諗用手機住拍低佢，叫佢講多次，佢突然改台詞話好期待有個妹妹。有次屋企食飯，囝囝又話就嚟有個親妹妹。。。」
37歲無綫前主持何基佑，16年約滿後離開，去年過檔為ViuTV主持兼監製幼兒教育真人騷《超級奶爸》，分享育兒心得。何基佑同太太有一名3歲多囝囝何清義（Nathaniel），今日凌晨佢哋一家三口喺網上拍片公佈家中再添新成員，片中何基佑老婆宣佈懷孕4個月，呢胎陀住B女，生埋湊作「好」字，就可以收工。
《蘋果》今日致電何基佑，佢話：「係呀，老婆有咗兩個幾月先知，話說4月底時，我哋全家去韓國玩，囝囝上機前猛話好期待坐飛機，咁我諗用手機住拍低佢，叫佢講多次，佢突然改台詞話好期待有個妹妹。我成家都不以為然，及後返到香港，有次屋企食飯，囝囝又話就嚟有個親妹妹。我哋都覺得囝囝點解咁講，係咪有上帝指引，咁啱老婆見未來經，於是就驗一驗，真係有咗。唔係囝囝預言，可能我哋仲矇盛盛，其實我哋一向有設防，今次失守咗。」
何基佑都覺係啱時間再有第二個小朋友，仲唔到仲係女，湊成「好」字，佢話：「兩個夠數啦。」何基佑離開無綫兩年，發展唔錯，問佢再生多個，擔子係咪重咗？佢答：「離開咗無綫兩年，可以做到自己想做嘅節目，就算過去喺無綫都唔係好忙，我仍然大部份時間同經理人去接司儀騷，但拍咗ViuTV節目，我反而多咗親子嘢，工作種類多咗。」
(蘋果日報)
