鄧麗欣（Stephy）同前棒棒堂成員邱勝翊（王子）甜蜜公開戀情，舊愛方力申喺荃灣出席展銷活動， 被傳媒包圍問回應，問佢有冇恭喜Stephy，小方仲自爆一早知。
小方話：「早兩三個月已經知道，我守秘密幾好，亦都見過佢哋冇尷尬，公開咗之後希望大家問佢嘅嘢可以問我少啲，可以問返佢多啲，其實呢段時間我喺自己網裏面都好多fans同我講見到佢哋，所以我都知道。」之後小方又叫大家以後有嘢可以問番Stephy，仲勸fans可以focus返個人感情，同父母之間嘅感情，唔使太過關心佢呢方面。
至於由乜嘢渠道知道兩人拍拖？係咪Stephy親口講呢？小方避談：「太過Detail喇，我哋見過面有打個招呼冇尷尬，你哋最關心都係想知我尷唔尷尬啫！（幾時見過？）唔只見過一次，但冇尷尬。」笑問佢覺得Stephy同王子係咪好襯？小方就話：「女仔鍾意咪得囉，你哋教我答嘅。」
小方再被問到覺得王子靚仔啲，定佢本人靚仔啲？佢就笑住話：「邊有得咁講，依家唔係選美，我唔係sell樣嘅，sell緣份同隨緣囉！（係咪戥Stephy開心？）呢個問題好得意，咁梗係啦，你教我可唔可以有第二個答案呢，我叫小方啫，其實個人好大方，唔好再問我呢啲咁難答嘅問題啦！」
至於佢自己感情有冇著落？小方就好巴閉咁話：「我大把女，泳會有幾十個女，多到不得了，完全唔使愁，開心到不得了，日日對住無憂無慮，天真可愛小朋友，好享受游水工作 。」最後，大家問小方知唔知Stephy鍾意王子啲乜？小方就正經叫大家問番Stephy嘅閨密，因為作為前度不能太close。
另外，早前佢睇波時上載一張照片，背景有位女性，佢自我解畫指相中女子非其女友，呢個舉動被Stephy批評為此地無銀，小方就解釋：「我講咗報紙都寫，唔講仲得了，講咗係有先見之明啫，我唔需要呢啲版面。」
(蘋果日報)
