最近頻頻喺社交網曝光嘅梁洛施（Isabella），聽日就會繼2013年再次復出，出席喺中環化妝品活動，喺復出見人前夕，今日佢又喺Instagram上載一張當年佢抱住只有半歲大嘅大仔李長治嘅相，留言︰「於我而言，家庭重要，事業同樣重要，得到家人的支持，令一向喜歡演藝事業的我能重投工作，做一個有自信兼且獨立的女人！」之後佢仲tag住「#WomensPower #努力工作 #兒子的榜樣 #為愛我的人努力 #獨立自信 #GirlsPower」，睇到佢對今次復出好有決心，唔少網友都留言叫佢加油。
至於Isabella上載呢張抱住大仔長治嘅相，又話「得到家人的支持」，「家人」點都應該有李澤楷份啦；至於點解唔出囝囝新相，而出番2011年發俾傳媒刊登嘅舊相，未知係咪因為「家人」唔想小朋友曝光率太高啦。但估唔到Isabella冇用原相，反而cap過張相，所以質素上有少少散。今日較早前Isabella仲去咗跑步，佢仲貼咗張相，顯示佢跑咗7.35km用咗41分鐘時間，佢留言︰「有時候身體就不想動，但是我必須的！美好的一天又來了，期待明天跟大家見面喔！」
(蘋果日報)
