點知畀老婆鬧爆，佢就話﹕「所以每收一個朋友短訊就鬧一次。我份人性格就係咁，衰性格，對太太、父母、仔女都係咁。。。」
森美因為宗教信仰，所以好少談論玄學，但上得嚟《玲機一動》節目，都自爆咗一單同玄學有關嘅嘢，仲影響佢一生。
森美笑笑口話﹕「記得同老婆求婚時好浪漫㗎，喺法國香榭麗舍大道。當時同老婆入去一間飾物店，佢見到一隻vintage戒指話幾靚，我就話麻麻地俗氣，但轉頭偷偷去買。一心諗住上到巴黎鐵塔頂求婚，點知喺香榭麗舍大道鬧大交，我就問自己『係咪鬧交仲鍾意呢個女人？』我答係，就求咗婚。點知，過咗一年都未結婚，佢突然同我講話幾年前睇相，今年唔結就會散，佢仲會搵到過好過我嘅男人，咁我即刻娶啦！婚後十幾年講番呢件事，佢竟然話『咩相士』，係咪呃人吖，簡直係麥玲玲過你一棟呀！」
森美話到依家都會成日同老婆鬧交，因為之前患抑鬱症，有時脾氣都好大，幸太太會忍讓自己。向來口多多嘅森美，好愛老婆陳雅嫻(Veronica)，但又唔識表達。早前係旅遊節目話好想同愛嘅人一齊睇雙彩虹，點知畀老婆鬧爆，佢解釋﹕「人人以為我好錫佢，但佢覺得一啲都唔錫，所以每收一個朋友短訊就鬧一次。我份人性格就係咁，兜口兜面唔識表達，衰性格，對太太、父母、仔女都係咁，見到就板起塊面，唔見個心就好掛住心軟。」
結婚15年，森美都係從一而終，亦唔介意畀老婆check手機，佢話﹕「男人個心都係想見識嘅，但我孤寒，出去玩仲要我畀錢你，咁就唔係好抵啦。」玲玲師傅取笑森美追女仔都係「齋講」，拍拖次數唔夠五次，森美哈哈笑話﹕「係喎，人有兩種，一種行動派成日追女仔，好似運動員跑得快，但講唔到你知點跑，教練就會諗到方法，所以我啲橋都係work嘅。」
而森美同小儀多年來合作無間，對於經常踩小儀，森美話係為小儀好﹕「香港人大部份都係有善心同愛心，踩佢低過實際，大家就會抬番高佢，但如果有聽我做節目，都知我依家冇乜理佢，哈哈。」
(蘋果日報)
