陳豪今日喺灣仔出席Swisse法拉利F1車隊官方合作夥伴傳媒活動，以賽車手造型現身嘅佢，笑指喺F1賽車方面，自己係「處男」，難怪佢獲邀玩F1模擬賽車遊戲嘅時候，見佢揸得好慢，事後陳豪指自己平時揸車，雖然快又得，慢又得，但都係一名安全駕駛者，尤其係o依家有咗小朋友，不過佢好有自信咁話：「我試過揸唔靚嘅車，但揸到好似賽車咁。」
講到老婆陳茵媺（Aimee）帶住3個子女返加拿大多倫多探親，陳豪被指可以放暑假，佢笑住話：「反而佢哋走咗，我覺得好空虛，唔知點咁，睇電視又睇唔到咁耐，瞓又瞓唔到咁多；我因為有嘢做，所以離唔開，不過去加拿大在於小朋友嚟講係好，因為可以見到公公婆婆。」
Aimee一拖三返加，陳豪指上年已經試過，但最難搞始終係搭飛機嗰陣，佢話：「妹妹上年仲係BB，但今年就周圍走，大哥好啲，佢都會睇下電視，但二哥同妹妹對電視冇乜興趣。」
陳豪表示每日同3個子女都會視像親子樂。提到Aimee獲網民大讚佢係Super Mum，陳豪即刻話：「佢係呀！佢生3個已經唔容易，仲要湊3個。（你呢？）I am Super Dad，有準備就唔難湊，冇問題！不過媽媽同爸爸嘅湊法有唔同，媽媽有規律，我就會用糖、朱古力賄賂，但最後我都會被媽媽鬧。」
（蘋果日報）
