下月便33歲嘅宋熙年（Sarah），前年同陳智燊（Jason）拉埋天窗，佢哋呢對圈中模範夫妻出名鍾意小朋友，今年初如願造人成功，將一索得男，o依家陀B約7個多月，宋熙年個肚開始越嚟越大，早排仍然有做幕前演出。不過近日已開始停工待產，宋熙年趁住身手仍然咁靈活，佢日前就去咗影咗大肚寫真集，留下美麗孕記，佢今日貼社交網同大家分享靚相。
宋熙年大肚寫真，大玩黑白型格look，其中一張相，佢着住黑色露腰裝配三角褲，巨肚又圓又大，但佢手腳仲好纖瘦，未見水腫。
宋熙年笑着雙捧住巨肚，好似隔肚同BB溝通咁，呢個甫士好有愛嘅感覺。Jason當然同妻及BB來個「仨」人行，谷奶升cup嘅宋熙年不經意騷出事業線。
宋熙年都好小心飲食，見佢懷孕期間都有為老公準備住家飯。Jason好細心照顧老婆，講到呢輯相拍攝過程，佢今日回覆傳媒時話：「影相過程好開心，BB嗰日好聽話，冇乜點踢。Sarah呢排身體狀況好好，唔會太辛苦，好感恩BB狀況好，食得瞓得，BB檢查過所有嘢OK，我好安樂，希望其他嘢都順順利利。」有冇為老婆煮嘢食？佢話：「煲湯煮嘢食我唔識，問番Sarah。食清啲，澱粉質唔好太多，食多啲菜，佢食一般正常嘢。」
唔少星級爸爸分享過剪臍帶如剪豬腸？問到Jason有冇買啲剪吓練習？佢好搞笑咁話：「咁咪要去街市?」講到老婆已開始停工待產，Jason話：「停咗啦，輕鬆都OK，大肚婆要relax嘛，老公都可以relax。」
(蘋果日報)
