鄧麗欣（Stephy）噚日公開承認戀上前棒棒堂成員邱勝翊（王子），發展姊弟戀，今日Stephy再出動。
有愛情滋潤真係唔同啲，Stephy着咗條喱士短裙，仲疑似真空，問到男友知唔知佢真空上陣？會唔會投訴佢太性感？佢表示暫時未有，而佢自己嘅底線確係比以往低咗，因為近排佢鍾意着呢類透視裝，而且自己嘅接受能力好高，問到使唔使畀男友過目？佢話︰「唔使，OK嘅。」
提到唔少fans話佢哋好合襯，戥佢哋嘅戀情開心，Stephy話︰「多謝大家，都希望大家開心，多謝大家的祝福。」會唔會視王子為結婚對象？佢就話呢方面暫時唔講住。
至於Stephy嘅舊愛方力申，噚日被fans問佢有冇女朋友時，小方用手掩臉話：「別提了！」唔知係咪小方知道Stephy有新戀情先冇眼睇呢？對此Stephy都好維護舊愛話︰「佢搞笑啫！佢都唔係答呢個問題。」
而噚晚小方同朋友睇世界盃時拍片貼上網，片中有個女仔誤入鏡頭，小方即刻喺片中澄清話︰「佢唔係我女朋友。」聽到小方咁樣，Stephy揶揄小方︰「佢此地冇銀啫，不過我冇睇條片，佢嘅事問番佢啦。」而小方亦有祝福佢，Stephy都好多謝對方亦祝福小方，睇嚟佢哋再見亦是朋友。
講到噚日認愛之後，有冇同王子傾番，Stephy話︰「冇特別去傾，自己都冇留意番啲新聞，但有好多朋友send訊息祝福我哋，始終唔想將感情放得太高，想專注工作，唔好影響大家嘅工作。」
另一方面，王子噚晚約9半由台灣抵港，一個人冇助手陪住出閘，戴口罩、黑白直間衫，同噚日佢喺ig story嘅打扮一樣。之後佢一個人行咗去停車場，撳咗10分鐘電話先有七人車嚟接，呢部七人車疑似係Uber，直駛到去銅鑼灣富豪酒店。
不過抵埗後，王子唔係入酒店check in，而係上咗另一部一早喺酒店附近等緊佢嘅七人車，盡麈而去。翻查之下，呢部七人車原來仲係噚日Stephy出席活動時坐過個部七人車，目的地係邊，唔使講到明喇啩？
（apple daily）
