已6個半月身孕嘅佢，仍然活躍周圍飛，佢早前才飛美出席好友鍾欣潼婚禮，近日又飛去英國進修，佢報讀咗建築計與管理的碩士課程，佢要留喺倫敦一個月，老公就去咗美國公幹，兩公婆分道揚鑣。
大住肚嘅蔡一鳳勤力返學，今日周日休息，佢凌晨5點幾喺酒店好夢正濃，突然發生走火警，佢狼狽跑樓梯逃生，佢人安全逃到酒店門外，才貼facebook報平安，佢留言：「我穿上衣服，把保險櫃裏所有嘢掃入書包，抓着桌上的手提電腦、電話（還不忘充電器），就往外跑，因為打電話跟酒店確認了是火警，所以覺得真心可怕，親身經歷係倫敦凌晨5點走火警，還懂得帶一對韓國老夫妻走樓梯，折騰了成個鐘….最後虛驚一場。人生第一次經歷酒店真實走火警，我當時腦袋裏面想着甚麼呢？還好只是4樓。」
《蘋果》今日聯絡蔡一鳳，佢話剛平息了火警風波，酒店員工安排了住客們逐一返回房間，佢講番逃生一刻情況：「我瞓着咗，聽到火警警鐘響，我見響唔停就醒咗，仲打去接待問，佢叫我快啲離開，仲話所有住客都走咗落去，我就執嘢着番衫走，出到去見到有對韓國老夫婦準備坐電梯，我叫佢哋行樓梯，好彩我住四樓，如果好高十幾樓都唔知點算好。出到酒店外，見到好多住客都狼狽，佢哋有着住浴袍，有披住大毛巾，亦有幾架消防車嚟咗，最後發現係酒店廚房有嘢燒着咗，住唔係大問題，我哋就可以返番去房度。」
佗B蔡一鳳走警都好鎮定喎，問到BB當時肚中反應，佢話：「一聽到火警鐘，阿B喺個肚係咁錫，我行樓梯時又踢，直至安全出咗大門口，佢先冇踢得咁犀利，好有靈性。」蔡一鳳返房休息時，佢話心情仲有啲緊張，已經瞓唔番，佢就自拍咗張相向老公報平安。照片中睇到蔡一鳳個肚都開始大，諗番佢仲去樓梯逃生，真係好驚險。其實，根據資料顯示，蔡一鳳前年喺銅鑼灣hmv kafe食飯，餐廳突然發生響火警，佢都趕快離開，最後原來係誤鳴，蔡一鳳兩年走兩次火警，佢都自嘲好「惹火」。
(apple daily)
