「上天對我好好，罰我又畀機會我，我自己好鍾意食甜嘢，胃cancer最鍾意糖，依家割咗胃，雖然冇咗胃，都照可以食嘢，都係任你食，不過。。。」
57歲星級髮型師Jacky Ma(馬桂燦)入行40年，佢係軟硬天師林海峰、葛民輝、草蜢、袁詠儀、達明一派嘅御用髮型師，近日盛傳佢健康出現有問題，佢朋友日前就喺fb貼了一張去醫院探病相，當時Jacky Ma就身穿公立醫院病人服，佢戴上帽同臉頰兩旁明顯暴瘦，而佢本人星期三就出post，貼了自己後生相，一對仔女成長過程相，留言向親友報平安，指自己已成為一個無胃嘅人：「多謝數個月來一路在擔心我病情的朋友死黨同事和家人們，我已為自己爭了一口氣，和為你們鬆了一口氣，而給醫生醫好了我的重病，我現在是一個無胃的人，希望你們會繼續讓這個無胃的人在你們的生活上左穿右插，不怕騷擾我就每秒鐘都活得開心至到不得了．今午我已回家開始休養了，朋友們記住不要嘗試去醫院探望我，記住記住。」
Jacky Ma就已返家休息，《蘋果》就聯絡到佢，電話傳來佢嘅聲音，聽落好精神兼且有中氣，問到佢為何要切胃，佢表示：「我係做咗切胃手術，主因係我做呢行做咗40年，吸咗唔少噴髮劑，其實一直都覺得唔對路，我10年前開始食胃藥，自己係一個好怕睇醫生嘅人，諱疾忌醫，好驚睇完醫生，佢話我生cancer，好多我嘅客人都介紹好好，好出名醫生畀我，不過我一直都係食完胃藥冇嘢就冇理。」直至幾個月前，一向瘦削嘅佢發覺自己暴瘦，幾個月之間瘦咗近20磅，再加上有一次佢食螄蚶肚痌才去求診，去了瑪麗醫院睇醫生，先發現胃部有腫瘤：「醫生發現我胃腫瘤好大，我自己一直唔覺，因為我剪頭髮，有功夫底，平時紮晒馬，內臟係有做運動。」
Jacky透露幾個月前開始化療，待腫瘤細了，就喺上星期三(4號)做了切胃手術。對於自己大病一場，Jacky就表現得好樂觀，太太Janet離世，自己係單身家庭，照顧一對子女：「生命係可貴，點樣要過得漂亮最緊要，個天畀咗alarm我，自己成個過程冇特別驚過，不過當然會掛住仔女，我大仔就快讀中大生物醫學研究，佢成日話要研究點樣醫老人腦退化病，我個女15歲，好鍾意做運動，佢想做女飛人，自己都仲有好多嘢想做，呢幾年喺大陸搞緊project，都想搵多啲錢照顧佢哋。」
佢今朝更在Ig貼了出院後新相，即同軟硬、呂方開餐，更飲紅酒慶祝，佢就再留言講到自己病情：「昨天醫生説我身體康復完比一般病人快，我想是因我平常剪頭髪時大多數都是站著剪的，有點兒像在扎馬打詠春拳的馬步，剪時如手勢正確入行四十年了都應該對身體有點益處的。」
佢仲大讚軟硬係佢嘅奇怪偶像：「真的佩服他倆到五體投地，跟他們合作了30多年，看見他們對在工作上每個細節的要求好美，總之在對工作認真程度上，真的令小弟都學到一些好嘢，跟他們工作都幾好咖，又有糧出，又有嘢學。」
Jacky回覆《蘋果》時，提到自己病後，依然如常進食：「上天對我好好，罰我又畀機會我，我自己好鍾意食甜嘢，胃cancer最鍾意糖，依家割咗胃，雖然冇咗胃，都照可以食嘢，都係任你食，不過由直腸直接去小腸，依家自然食量係細咗、小心咗，噚日同呂方食好多嘢，食食吓自然停，我自己食嘢好簡單，一碗麵都得。」
自言工作狂嘅Jacky就話隨時可以返工，笑言因為佢班客人唔會放過佢，要搵佢識頭髮：「自己以後要小心啲，噴髮劑有酒精，自己唔戴口罩，我都係死喺呢行。」佢就話病咗一段日子，佢班客人對佢好關心，叫佢加油：「靚靚當日叫我睇醫生，佢畀咗啲名貴補身食物我，蔡一傑對我好好，其他客人同家人日日煲湯畀我。」
(蘋果日報)
