李亞男(Leanne)今日宣佈有喜，唔少人都戥佢哋開心，佢哋一班Amazing Esther嘅閨蜜，好似鍾嘉欣、王君馨、岑麗香及苟芸慧，當然戥好姊妹開心！
身在溫哥華嘅鍾嘉欣，今日接受《蘋果》訪問，佢話：「首先我戥Leanne同祖藍非常非常之開心，我等咗同期待Leanne公布呢個消息好耐㗎喇！希望大家會祝福Leanne，BB都係健健康康，喺呢個Pregnancy嘅過程都係順順利利，能夠同Leanne同時間懷孕，真係好開心！」
準人妻苟芸慧就話：「恭喜祖藍同亞男，好期待見到佢哋既BB出世，佢哋一向都好鍾意小朋友，亞男性格賢淑，相信一定會係個好媽媽，真係戥佢哋開心！」唔知會唔會做契媽，苟姑娘就話：「如果佢哋希望，我當然好願意！」王君馨亦都話：「我哋好戥佢開心呀，Leanne係一個好好嘅老婆，而且又識得烹好多好美味嘅嘢食，我相信佢會係amazing mom！」Grace仲話只要想，佢唔介意做BB嘅契媽！之後香香都話：「我都係俾大家知早少少，當然希望佢陀B陀得唔辛苦，生出嚟嘅BB可以肥肥白白，至於做唔做契媽，就等佢自己決定！」
(蘋果日報)
