41歲大S徐熙媛今年五月不幸小產，未幾已復工，雖然身體回復需時，但有老公汪小菲跟她一同面對，共度順逆。而兩人早前為大陸芒果台拍真人騷《幸福三重奏》，兩公婆嘅私下相處嘅情況展現晒喺觀眾前面，節目只係播到第2集，觀眾嘅迴響已經好大，大S慘遭網民攻擊，話佢喺節目入面愛哭又做作，身為老公嘅汪小菲，噚晚終於按奈不住喺微博發文護妻，話老婆只係做回自己也要被罵，佢反問：「到底是誰不正常！」
新嘅一集嘅節目入面，汪小菲教大S踩單車，開頭係汪小菲載住老婆，大S坐喺老公後面，但因為啲路有啲彎曲，單車上面又坐住兩個人，搞到汪小菲都有啲難以平衡，咁當時佢就諗住加速希望可以快啲咁騎到較為平坦嘅路，就係咁嚇親老婆，搞到大S大叫同喊咗出嚟，之後汪小菲就落車安慰佢，有網民見到大S爆喊，就話佢愛哭同做作！
汪小菲見到網民反應咁大，佢就喺微博貼文為老婆平反，睇到一啲留言，有啲女士為咗取悅男士，任何事情都會去做，就連向自己另一半撒嬌、哭都要被話，呢點係佢無法理解，佢再話：「好想想，到底是誰不正常，正常的男女關係，不就是應該讓自己的女人開心、撒嬌，偶爾被考驗一下嗎？口口聲聲探討男女平等的時候，清（請）先把自己擺在平等的位置上吧。」
他之後再補充：「如果在婚姻中她給你生了倆孩子，付出很多，但是還不許哭，還不許要老公讚美，還得做家務，還得硬著頭皮每天假笑，帶孩子，自己男人就應該在外面天天飯局，所謂的事業有成，這是什麼價值觀啊？」而大S嘅妹妹小S(徐熙娣)見到姐夫咁Man維護家姐，亦即時轉發佢嘅護妻文，更留言話：「小菲很男人，真正的男人！」
汪小菲解釋大S在節目顯得脆弱敏感，係因為剛歷經小產之痛，仲話：「這個節目讓我們迅速的從難過中走了出來，單獨相處去珍惜彼此的獨處時間。做女人不易，做媽媽更不易…做一個北京直男的老婆更不易。」但睇番報道，其實大S懷孕期間，除咗一直拍緊呢個《幸福三重奏》，同時亦擔任大陸另一綜藝節目《我要當女一》評審，之前台灣《蘋果》亦拍得大S兩公婆帶埋囝囝一齊拍《幸福三重奏》，當時大S腹部微隆，半個月後不幸小產。
(蘋果日報)
