「要靠自己，每個人講嘢都聽唔入耳，收埋咗自己，又唔敢同人講，雖然冇睇醫生食藥，但有搵朋友傾訴，咁多年嚟母女關係最好就係嗰段時間，佢又會同我睇相傾偈，話畀我聽我愛你嘅人就喺你身邊，你唔可以咁樣做。」
莊端兒、寇鴻萍、羅蘭、黃允財今日喺中環出席新書《開心法術》發佈會，書本內容圍繞香薰治療情緒，並會為慈善出力籌款。
莊端兒兩年前經歷低谷，愛情事業失意，又患病割咗個膽，體重下降至100磅皮包骨，佢話：「最初諱疾忌醫，以為自己壓力大，後來病到一發不可收拾，當其時我以為會死。」莊端兒分享情緒低落時心情：「要靠自己，每個人講嘢都聽唔入耳，收埋咗自己，又唔敢同人講，雖然冇睇醫生食藥，但有搵朋友傾訴，嗰段時間幫到我最多係媽咪，佢本身喺澳洲居住，專登返咗嚟香港陪住我，驚我做儍事，咁多年嚟母女關係最好就係嗰段時間，佢又會同我睇相傾偈，話畀我聽我愛你嘅人就喺你身邊，你唔可以咁樣做。」現時佢堅強得多，回想一個經歷令佢成長咗，o依家面對一啲事情都會覺得好小事。
寇鴻萍喺97年經歷離婚時候情緒低落，將自己收埋半年唔見朋友，經過半年後才能走出陰霾，開始社交，勸喻遇到情緒問題嘅人一定要行出去搵人傾訴。
講到錢慧儀由老公證實下患情緒病，及有傳婚姻觸礁，寇鴻萍話：「同winnie相差一年選美，以前好friend，因為佢我先參加選美，大家一齊做model，仲問佢選美有冇黑幕。最近唔知道佢點，人生會經歷好多，有需要要尋求醫生，我都試下聯絡佢，但已經好多年冇見，知道佢嘅小朋友都大個，好多年前飲過嘢見面，希望佢冇事祝福佢。」
（蘋果日報）
