孖衛蘭（Janice）於灣仔會展開音樂會，台上搭起小屋及天橋裝飾，身穿藍色西裝褸配淺藍色裇衫的他，與穿黑白灰色裙、少露香肩配搶眼螢光色高踭鞋的Janice分別於台兩邊現身，唱出《Overture》、《Teenage Dream》揭開序幕。
之後二人演繹對方的歌，Janice先唱出歌手陳柏宇（Jason）的《親愛的仇人》，Janice笑話：「呢個組合好特別，發現我哋係差唔多出道咗十幾年，但正式合作就係今年年頭。」她又講到可以互唱歌曲感覺好好，之後就轉向Jason話：「我啱啱唱都好緊張，知你聽住我唱，咁我唱你首歌好唔好聽？」Jason即刻笑話：「唔好玩啦！梗係唱得好啦！」令全場爆笑！二人續話今晚演繹的歌曲都有重新編排過，有不一樣的感受，說畢就輪到Jason唱出Janice的金曲《就算世界無童話》，仲得戚叫對方「睇表演」添！
輪到Jason講「夢想」，他趁機情深向未出世的B囡表白：「雖然我唔係喺傳統家庭中長大，但呢個世界好多人畀愛我，我夢想就係希望將呢份愛傳開去，傳開去呢個世界嘅每個人，傳畀我即將嚟緊嘅BB囡。」說畢便連出唱《沒有你 我甚麼都不是》、《別來無恙》。
Jason又講到太太符曉薇有專程嚟棒場：「上次聽完《生涯規劃》就愛上，所以都想嚟聽，佢依家狀況OK，只係有時腰會累啲，唔知佢記唔記得戴腰封。」
（on.cc）
