藝人李亞男到電台宣傳烹飪書，講到新書她表示用了一個月時間籌備，用了3日影30多個菜式，而食譜自己就儲了一年多，她表示：「其實我識煮嘢食都係呢一年嘅事，之前都係喺挫敗中成長。」她謂最緊要不好認輸，自己都失敗過很多次，問到之前失敗時，老公王祖藍可有直接話不好食？她笑言：「之前拍拖嗰陣煮咗啲湯同食物失敗，佢會即刻話難食，推開佢，仲要飲水𠺘口，佢真係好直接，可能佢由細到大都係食家，佢哋屋企食碗魚蛋米都要搵最好食，蒸條魚都係要啱啱好熟先滑。（咁咪好大壓力？）係㗎，所以我之前係立志結婚之後唔會煮嘢食，就算媽咪話教我我都唔學，因為覺得自己冇天份，但後來做咗太太之後慢慢就改變咗，因為都想老公食得健康啲。」她亦希望藉此鼓勵女孩子不要輕易放棄。
藝人李亞男到電台宣傳烹飪書，透露書展期間會有簽書會。講到好姊妹岑麗香（香香）在社交平台疑似宣布有喜，她就謂：「唔清楚，但暫時應該冇喜訊，唔排除佢哋將來會有BB，都希望佢哋可以快啲有！（你同佢鬥快？）唔好，要保持輕鬆心情先得。」而講到她好似肥了，她表示為生B調理身體。
問到奶奶現時對她廚藝評分如何？她笑言：「進步咗，但未去到滿分，應該6、7分。（祖藍呢？）佢係咁話「你好叻呀」，係咁同人講太太煮嘢食好食。其實都開心，朋友上嚟我屋企食飯都讚好食，甚至跟我煮得成功。」她亦謂最勁試過一個人煮19個人份量的菜，但笑言以後最盡只會煮10個人，因為太辛苦。
（資料圖片）
（on.cc）
