【黃昏戀修成正果】新娘子吳香倫哽咽感觸

62歲嘅陳榮峻（原名陳榮基）去年底喺無綫職工盆菜宴上，向拍拖3年嘅58歲女友吳香倫求婚成功，「黃昏戀」修成正果。

一對新人今日喺中環堅島香港天主教聖母無原罪主教座堂舉行婚禮，約下午1點半左右，一對新人坐住火紅色平治房車抵達教堂，陳榮峻先落車，之後就開門畀太太落車，相當有風度。見吳香倫着住件米色拖尾婚紗，有個女仔幫佢拖住個尾，同陳榮峻一齊行去車頭畀傳媒影相。

今日唔少藝人到場祝賀，好似洪永城、余慕蓮、阮兆祥、林敬剛、羅蘭、袁潔儀、陳美琪、梁舜燕等等。而陳美琪就喺儀式上為一對新人讀經。

宣讀許諾時，吳香倫一度哽咽感觸，之後兩人交換戒指，台下親友歡呼拍掌，新郎哥幫新娘子揭頭紗後，男方親吻太太，新娘子就合十謝意。接下來一對新人簽署結婚證書，未簽前吳香倫已用紙巾拭淚及抺鼻。一對新人喺台上時，陳榮峻更不時細心照顧太太一舉一動，又幫太太整理拖尾婚紗，出席婚禮嘅賓客於台下唱詩歌，場面神聖感動。

（apple daily）