黃子華連開26場嘅最後一次棟篤笑「金盆o浪口」，吸引唔少圈中好友捧場。不過，前晚其中一位到嚟睇騷嘅好友，就令子華勾起好多往事回憶，第一時間喺後台喊到失控。
對方喺佢第一次開棟篤笑時仗義相助，當時嘅子華因為擔心銷情慘淡而到處貼街招宣傳，期間更講到哽咽。子華冇諗到對方突然嚟捧場，所以一見到祖輝就挨喺佢肩膀，忍唔住流下男兒淚，之後仲要用紙巾拭淚。
子華流下男兒淚(ig圖片)
而呢位好朋友，原來係同子華識於微時嘅林祖輝，子華每一晚都係喺台上多謝祖輝。林祖輝接受傳媒訪問時話﹕「佢話最後一次騷，會諗番最後一次點準備，因為頭一段時間都有幫手，佢諗番成個棟篤笑，有啲回憶，所以好感動！」有指當年仲喺由祖輝幫子華去紅館攞表，申請文化中心個場，佢哋又一齊度棟篤笑個名，連沙士期間開騷，祖輝仲幫手喺門外派口罩畀觀眾入場，真係難兄難弟。
原來係林祖輝….(互聯網圖片)
子華同祖輝識於微時，子華第一次開棟篤笑，祖輝都有幫手貼街招。(互聯網圖片)
祖輝話同子華喺商台同亞視都一齊共事過，所以變成好朋友，當年子華話想搞棟篤笑，祖輝二話不說就幫手，佢話﹕「對我嚟講唔係咩事，我就唔覺辛苦。佢話想搞，我咪幫佢去攞表Book場囉，大家都驚冇人買㗎，當年係文化中心搞，得三百幾個位，仲要開兩場。」
兩兄弟一齊去油麻地貼街招，又去尖沙嘴太空館門外拉Banner，祖輝諗番都笑笑口話﹕「都唔知點解揀油麻地，應該去啲高級啲地方嘛，貼完都唔知有冇效，好彩又爆喎。之後就由文化中心搬去伊館，再由伊館搬去紅館，我諗子華都係有太多回憶，話晒係最後一次搞啦，睇番佢開騷前嘅video，一張大櫈、鞋、床等道具，好似話你知所有嘢告一段落咁，我睇到都有感覺。」祖輝直認現在與子華少咗聯絡，因為各有各忙，佢話﹕「大家係少咗聯絡，但朋友就係咁，有事就一定幫手。好似我幾年前開童裝鋪，佢都二話不說嚟撐場。」
(apple daily)
