陳豪今日單拖現身中環海濱活動空間，出席願望成真基金主辦嘅「願望童樂日」，活動中陳豪仲同患急性淋巴白血病、今年5歲嘅小妹妹Selina互動。陳豪同太太陳茵媺今日分別都有工作，所以冇帶3名仔女出嚟。
提到自己小時候曾有過咩願望？陳豪話：「我細個同媽咪講咩都唔需要，有咩嘢想要我會自己爭取。」至於3名仔女年紀尚輕，仲未懂得何謂願望：「但佢哋會講鍾意咩食物同玩具，所以o依家都會將自己嘅價值觀教仔女。」又話做父母應該做好榜樣，從旁鼓勵仔女開創自己人生。
陳豪直認思想傳統，有時太太更勇於俾小朋友嘗試：「我見到佢哋拎玻璃杯會騰騰震，反而太太會由得佢哋，培養佢哋自發性。」陳豪仲坦言仔女已經開始學識駁嘴，然而兩夫婦都反對體罰，佢話：「會有耐性咁講道理，有時都會隻眼開隻眼閉，基本上咩方法都做齊。」
(apple daily)
