《香港小姐競選》今日進行首輪面試，唔少準備參加面試嘅女仔陸續到達港鐵康城站，坐專車入電視城見評判，嚟得首輪面試嘅女仔，咩類型都有，唔知會唔會有啲吸睛新星出現呢？
11點左右，潛水教練Honey Ho 著住深紅色吊帶連身裙現身，仲擁有一身健康膚色嘅佢就話今次面試ok有信心。
另外仲有喺加洲返嚟嘅Norma 潘樂旻，擁有一身健康膚色加上身材唔錯，今次佢參加港姐面試，主力係想畀啲挑戰自己。
19歲北京舞蹈學院3年級嘅姚羽嘉，著住一條深綠色裙出現，外面仲加一件黑色外套，唔知佢熱唔熱呢？雖然喺北京讀書，但佢就好想之後喺香港發展，今日會有泳裝環節，問到佢有keep fit，佢就話因為最近演嘅一套舞台劇要增肥，所以keep唔到fit，問到佢有冇信心，佢就話有，仲想攞冠軍。
仲吸引到一啲本身做過藝人，同埋又參加過選美嘅女仔現身。湯沛宜之前參加過ViuTV嘅《美選D.N.A.》，今日就嚟到無綫面試港姐，佢就話平常心，不過都好鍾意選美嘅舞台，仲話唔怕因為ViuTV節目而有弱勢。
連前as one成員Nata都有到場，佢話自己休息咗一年，都好鍾意唱歌跳舞，突然就產生咗一個念頭嚟選美。
除咗有經驗嘅佳麗，仲有一啲素人睇落都好大機會入圍，著白色連身裙23歲嘅Hera喺中大讀護理，今年啱啱畢業，仲未搵到工，所以想趁呢一年試下參選港姐。
喺澳洲返嚟香港嘅Kelly今年23歲，提名佢嘅就係佢爸爸，今日都有陪住囡囡嚟。
今日18歲生日嘅Sonia就由媽媽陪同嚟面試，佢媽媽指想畀佢睇下個世界。
21歲嘅范莎莎，佢上年就參加過，最後落敗，喺荷蘭讀完旅遊管理畢業返嚟香港，佢覺得自己勝在有自然美，不過都擔心唔夠高同身材唔夠好。
選港姐提名人重唔重要呢？24歲嘅林昕雨就由黃夏蕙提名，仲係夏蕙姨嘅契女，問到點解嚟參選，佢就話：「想同契媽一樣有更高嘅知名度，都想幫到有需要嘅人。」佢仲直認喺大學嘅時候整過雙眼皮。
今次仲有中日混血兒參選，25歲嘅工藤佑采，爸爸係日本人，依家喺廣州讀工商管理，對身材各方面有信心，透視裝睇到佢有身材。
22歲嘅Lizzy身上有紋身，佢就話：「冇所謂啦！(係咪優勢？)唔覺得，自己鍾意。」
今日最年輕嘅佳麗係17歲嘅Mia，喺溫哥華返嚟香港，參選港姐係夢想，嚟緊會升中六。（圖左）
24歲嘅Mandy做銀行，今次想嚟體驗所以嚟咗參選，對自己有信心。
(蘋果日報)
