去年今日，佢透過社交平台宣布愛犬離世消息，而噚晚佢就喺ig上載咗一張攝於16年前，佢哋影嘅全家福：「我就是知道你一定會回來，轉個化身讓我懷上你。」
吳日言（Yan）前年10月，同拍拖17年嘅男友Barry結束愛情長跑，去咗沖繩註冊結婚，今年1月喺香港補擺喜酒後，上個月就宣布造人成功，可謂喜事一樁接一樁。
結婚時已講明會努力造人嘅Yan，上月開心宣布陀B，預產期係今年年尾。成為準媽媽，Yan當然開心，不過飼養了16年的愛犬win win去年離世，未能親自見證屋企有新成員來臨，的確令Yan感到遺憾。
噚日係Yan愛犬win win離世一周年，去年今日，Yan透過社交平台宣布win win離世消息，而噚晚佢就喺ig上載咗一張攝於16年前，佢同Barry及win win影嘅全家福。舊照中，當年仲係男朋友身份嘅Barry，負責手抱仲係超迷你嘅win win，Yan就一隻手同事掂住男友同win win嘅手，一家三口好不温馨。Yan噚晚就喺ig留言畀愛犬win win，話相信肚內BB，就係佢嘅化身。
Yan話：「WinWin不經不覺你已經離開了一年，我仍然記得16年前，你成為我家庭成員的哪一天，帶給我們快樂和溫暖。我就是知道你一定會回來，轉個化身讓我懷上你。」
(蘋果日報)
