小環都感到可惜，佢話：「本來可以救得番，不過因為我哋。。。」計番原來僅得9個月，有網民就喺facebook感嘆以後。。。
港姐譚小環14年喺銅鑼灣開「渣哥」轉行賣魚蛋，去年及前年先後喺尖沙嘴、鰂魚涌同旺角再開分店，極速擴張。分店中唯獨旺角一間係加盟店，不過該店去年底才開張，近日有網民貼圖話旺角分店摺咗，計番呢間店壽命僅得9個月，有網民就喺facebook感嘆，以後食魚蛋冇好多醬汁揀。
《蘋果》今日打去問番小環，佢承認旺角加盟店近日真係關門大吉，旺角向來租貴，唔知係咪「死因」，小環解釋：「最初我哋招收加盟店，幾位後生仔拎咗幾十萬出嚟，我哋提供一定服務，冬天開舖時，生意好好，不過轉入夏天，天氣熱，生意係差咗，要守業，但幾位年輕人嫌辛苦冇做，佢哋搵到人承接租約，所以就決定唔做。」
旺角加盟店摺埋，賺定蝕離場？小環答：「打和，佢哋真係比預期中冇咁好生意，咁啱又冇耐性守業，搵到人頂租約就冇損失。」其實加盟店同渣哥係簽咗兩年合約，理應依照合約仲要每月追交加盟費，小環話：「我哋決定唔收佢哋。」小環都對旺角店執笠感到可惜，佢話：「本來可以救得番，不過因為我哋好快會喺九龍灣同東涌港鐵站有新店開，近日我哋食物製造工場又開咗，我哋人手調動較忙，未有能力幫到旺角店，對於佢執笠都好可惜，其實幾間分店都生意上軌道，我哋稍後主力發展港鐵沿線店，所以就要有所取捨。」
(蘋果日報)
