陳茵媺（Aimee）今日到鯉魚門一間幼稚園出席兒童語言發展活動。
Aimee認為語言係同小朋友溝通好重要嘅一環，目前香港缺乏一啲專業意見分析平台，Aimee唔想小朋友太早擁有私人電話或電腦，最好放喺廚房或大廳等佢可以睇到嘅地方，咁就知道小朋友上網睇緊啲乜。Aimee對三位小朋友都會親自身教，無奈鬼妹仔特別緊張中文，佢話：「因為我哋都係講英文，國語就更加要交畀老師，自己中文唔係第一語言，如果教小朋友會教錯，o依家會有適當時間畀佢哋玩遊戲從中學習。」
而子女識說話就會開始駁嘴，Aimee話：「好自然，都算係，o依家會識得反駁我，都開心證明係識得互動溝通，唔係媽咪話唔得就唔得，例如大仔想食曲奇餅或者瞓我張床時就有好多藉口去達到目的。」
不過小朋友有佢嘅諗法之餘，大人都有佢嘅道理，Aimee話：「我比較著重規矩，唔會心軟，幸好佢哋都聽話好乖，媽咪同小朋友嘅信任同溝通好重要，我哋家庭逢星期五就係daddy’s night，小朋友同爸爸瞓，星期六就係mother’s night，同媽咪瞓，星期一、二佢哋就要自己返自己張床瞓，但有時都會走過嚟一齊。」
早前Aimee同陳豪結婚五週年紀念，兩公婆坐直升機去澳門慶祝，Aimee話：「食一餐正經冇小朋友嘅飯已經好浪漫，我哋嘅私人時間都畀哂小朋友，一向以時間行先多過禮物，但都想計劃下重臨結婚地巴黎。」
稍後暑假Aimee會獨自湊三位小朋友返加拿大一個月放暑假，老公陳豪就係香港工作同休息。
(蘋果日報)
