「婚紗已經揀好，有少少性感，如果有長輩在場時，會加個拖尾(遮蔽性感部份)，夜晚同朋友派對時先拆走。不過我唔想嘉欣太辛苦，其實都要到時先知，睇下佢哋安唔安全，交畀上天安排。」
苟芸慧、江若琳(Elanne)、湛琪清、林芊妤同歐陽巧瑩一眾即將踏入人生另一重要階段靚女們，今日齊齊參與尖沙嘴一間精品香水概念店開幕活動。
十月出嫁嘅苟姑娘指婚禮籌備上只參與了揀婚紗、姊妹團及賓客名單，佢話:「婚紗已經揀好，有少少性感，如果有長輩在場時，會加個拖尾(遮蔽性感部份)，夜晚同朋友派對時先拆走。」為咗能親自答謝每位來賓，婚禮當日會分不同時段宴請不同親友，另外又會返加拿大舉行家庭式婚禮，姊妹團方面，佢話:「我搵咗鍾嘉欣、岑麗香、李亞男、劉溫馨同兩位選華姐時朋友，不過我唔想嘉欣太辛苦，其實都要到時先知，睇下佢哋安唔安全，交畀上天安排。」
Elanne今朝零晨捧愛隊英格蘭差啲嚇到心臟病發，幸好愛隊能夠成功晉級，佢希望四年後能夠親身到現場睇世界盃，講到屆時可能已經有小孩，佢話:「我覺得都有，希望有3歲。」豈不是現在要開波造人？佢笑說:「仲有半年俾我結埋婚先，我想結婚時係最靚嘅狀態，唔想大住個肚。 四年後小朋友仲細，應該仲可以二人世界去睇世界盃，再多四年就可以帶埋小朋友一齊去。」
婚禮上基本嘢已經定好，至於婚紗亦已經設計好，不過無畀另一半睇，留番大日子畀佢驚喜，Elanne話:「佢話如果太性感會黑臉，又會準備一件西裝褸，覺得唔對路就包落去。」
(蘋果日報)
