佢做司儀同主持夠晒生鬼，可惜佢唔係大台高層余詠珊愛將，所以多年嚟喺無綫都係默默耕耘，冇乜機會發揮。原來，佢上個月底已經約滿無綫離開，今個月正式加盟ViuTV，主力做主持同司儀工作，昨晚8點ViuTV喺荃灣荃新天地舉行嘅《全民睇波派對》，正正係阿Lo做主持，第一日為ViuTV開工。
（資料圖片）
傳媒今日同47歲嘅林曉峰(Lo)聯絡，講到佢過檔ViuTV做一哥，阿Lo謙虛話：「唔好咁講，我都係跟班後生仔學嘢，以前就5年一個轉，依家就轉得太快，我幾乎跟唔切啲後生仔步伐，我都係跟佢哋學嘢咋。」問佢即走即過檔，唔駛過冷河？阿Lo話：「唔駛喎。自己都係想試吓新嘢，咁多年嚟我都係走嚟走去，又做過亞視又做過有線又做過無綫，咁多年都係坐唔定。」
（資料圖片）
最令人深刻印象當然係超級無敵獎門人啦！（資料圖片：蘋果日報）
跟住就主持《我愛香港》（資料圖片）
阿Lo話今次主力做主持，嚟緊除咗主持多個戶外嘅《全民睇波派對》之外，ViuTV仲會開個新節目畀佢主持，問有冇興趣拍劇？佢話:「都有㗎，但公司話逐步嚟。」咁人工係咪畀無綫時多？佢冇正面回答，只係話：「我喺TVB嗰時出鏡都唔係太多，主要收入都唔係做電視，喺出邊拍電影同做司儀做騷，依家我主要收入都唔係電視台㗎。」
（資料圖片）
佢哥哥林海峰一向幫ViuTV做VO，而家咪兩兄弟一齊幫同一個電視台打工？阿Lo話：「唔止，西瓜同我家姐(林珊珊)都有幫ViuTV㗎，仲有電台呢，我哋成家人經常一齊打工㗎。」
汪明荃鄭少秋林曉峰喺2015年TVB萬千星輝頒獎禮奪「最佳節目主持」
(apple daily)
