已平安誕女，暫時未改名，將交俾王爸爸及林爸爸決定。老婆陀B期間，只係陪過對方做一次產檢，佢讚老婆體貼，全力支持佢嘅工作。。。
台灣前組合可米小子成員、曾經拍過《換換愛》及《醉後決定愛上你》等台劇嘅王傳一，眨眼已經38歲，喺今年5月，佢被傳雙喜臨門，秘婚「蠍子女」林筱薇兼成功造人，噚日就有消息指林筱薇已經開刀平安誕B，B女重6.6磅。
今日王傳一喺台灣出席手錶品牌發佈會，剛榮升爹哋嘅佢心情大好，佢透露太太已平安誕女，更將呢位「前世情人」暱稱為「小屁美人」，暫時未改名，將交俾王爸爸及林爸爸決定。王傳一又指，今次老婆開刀係外父計好時間擇時辰，王傳一原本仲打算9點鐘陪老婆入產房，估唔到自己8點幾翻瞓一陣，一瞓就到10點幾先驚醒，老婆已經被送入產房，後來佢先知原來就算冇瞓過籠，其實佢都唔入得產房，畢竟開刀生B都算係個手術。
近期都喺大陸等地拍戲嘅王傳一，透露老婆陀B期間，只係陪過對方做一次產檢，佢讚老婆體貼，全力支持佢嘅工作，但佢怕同妻女長期分隔兩地，將來囡囡都唔認得自己，佢話自己把聲好低沉，每天同妻兒玩視訊，所以應該會認得。被問到點樣獎賞老婆辛苦生B，王傳一話：「我連續一年拍戲沒休過一周，能多陪她們母女就是報答，目標是做好一台提款機，希望老婆能帶小孩陪我拍戲。」
(蘋果日報)
