無綫熱播劇《天命》劇情緊湊，加上雲集多位好戲之人，自然受觀眾追捧。當中最搶眼嘅演員非張國強（KK）莫屬，飾演晚年「乾隆」嘅佢客串演出劇集，換言之只係出現四集，但因為夠晒好戲，演活乾隆嘅強勢一面，難怪廣受好評兼獲關注啦！可惜KK喺上星期四晚嗰集駕崩，但又唔使唔捨得佢離開嘅，皆因無綫官方專頁「myTV SUPER」剪輯片段，同大家重溫佢嘅昔日精彩作品。
講起KK一定會諗到兒童節目《430穿梭機》，當年佢、譚玉瑛同周星馳（星爺）等人負責主持，學生哥返到屋企一開電視就見到佢哋，可謂陪住大家長大。片中亦見到佢哋嘅搞笑演出，星爺叫KK隨便踢幾下波輕鬆吓，點知KK同佢作對，偏偏要展現精湛球技，令星爺冇咁好氣，唔少網友睇見都大嗌好懷念，仲話集體回憶返晒嚟！
當年同星爺做《430穿梭機》，絕對經典。
除咗主持兒童節目深入民心外，KK入行以來都演過唔少經典角色，好似早年《天龍八部》嘅「慕容復」、被喻為神劇《天與地》嘅「雷耀彬」及《大太監》嘅恭親王「奕訢」等，無論古裝戲定現代戲，忠角定奸角都統統勝任，演得入型入格。不過，有網民發現KK經常喺劇集中悲慘收場，除咗以上提及嘅劇集被眾叛親離或死去，就連客串演出嘅《天命》都難逃一死，有冇咁慘呀？難怪唔少網民都「集氣」希望KK下一套劇會有好收場，仲話想繼續睇到佢嘅演出。
慕容復要癲！
雷耀彬要坐監！
恭親王眾叛親離。
乾隆要死！
網民有話兒：
李貓X：好似冇一套有好結局，會唔會太慘！！
XXXmioWongwing：集體回憶返晒嚟～
ChakXXXMan：個樣冇變過咁，好犀利！
陳X文：可惜今晚個集會死，睇唔到佢超班演出。
（on.cc）
