已有兩名兒子嘅陳倩揚，為妹妹嘅加入積極做好準備，一啲都唔敢鬆懈，趁產前休息呢段時間，落手落腳洗衫仔同被仔，佢話：「今次除咗有上兩胎嘅經驗，再加上一直有做健康節目主持，經常接觸唔同界別嘅醫護專業人員，增廣咗好多知識，為迎接小生命有更佳嘅準備，亦可以同fans互相分享心得。」
揚倩同老公陳浩然已育有兩子(ig圖片)
陳倩揚佗緊第3胎，由於孕期已過37周，加上BB已足磅，醫生已預告孕媽隨時生得，要做好準備，一有動靜就要即刻趕去醫院。囡囡好快就會出世同大家Say Hi，工作狂嘅倩揚，都已經暫停所有工作，收拾好心情，準備迎接家中新成員。
比前一輯大肚寫真更性感
倩揚個孕肚特別大，佢話早兩個月啲朋友都以為隨時生得：「但其實只係肚形比較大，妹妹嘅size都算標準，同兩個哥哥差唔多。好多朋友都讚我狀態好好，手腳無水腫，我趁呢個珍貴時刻，影咗一輯寫真留念。」今次孕婦寫真由女攝影師操刀，令倩揚倍感安心，而拍攝時兩個哥哥返緊學，可以喺屋企嘗試上兩胎無試過嘅性感造型。
個肚特別大
今次輯相由女攝影師操刀
巨肚好快就消失，但倩揚話反而會覺得失落同唔捨得：「最掛念係母女一體同胎動嘅感覺。但又好想生完可以極速收身，再投入工作。」
（apple daily）
