無綫資深演員陳榮峻將於七月十日迎娶拍拖三年的藝人女友吳香倫，這對兜兜轉轉黃昏戀的確令人非常期待！
經歷過失婚失戀，於今年元旦終於搵到真愛，對方比他年輕近廿年、任職銀行，拍拖數月因甚為投緣，決定閃婚，好日子已定於今年十月六日。他自爆是未來老婆反追，才有勇氣再入閘做老襯！
現年53歲的藝人韋家雄早於20歲時結過一次婚，他曾表示是一時衝動，後來因性格不合而離婚。至2012年他遇到第二春，在橫店拍無綫劇《金枝慾孽貳》外景而與同劇飾演「春琳嬤嬤」的陳嘉嘉擦出愛火，當時有指女方是有夫之婦，關係搞不清下，仍交往了三年，最後因女方家長嫌他年長而遭拆散，感情路上再一次失敗，他一度心灰意冷！但估不到六年後，出現了「銀行之花」鄧楚雅（Keynes），正當人人以為他憑其冧女功贏取芳心，實情是女方使出「親手造禮物」一招，以真誠反溝家雄，成功將愛情之火處於死灰狀態的他重新燃亮起來。
家雄與Keynes結識後相處不足大半年，便認定對方，他不時在社交平台放閃，並定於十月結婚，現正籌備婚禮。而與他合作無間，感情要好的康華，當然要重槌出擊，準備豪花五位數字買金飾作賀禮。日前他們現身金飾店，見康華如兄弟般向家雄搭晒膊頭跑去揀金飾，但亦不及其後到場的Keynes搶鏡，一對新人一見面便Sweet爆手拖手，猶如剛拍拖的戀人般熱情，「三人行」出巡商場，逛完商場便到餐廳醫肚，家雄細心為女友揀美食，期間吸引不少Fans駐足觀看及邀請合照，場面熱鬧。
見當日家雄能夠左擁Keynes右抱康華，足證他在兩個女人心目中的位置。他雖然曾以搞Gag冧掂不少女生，身邊不少共事的同事都讚賞他是一名「暖男」，又愛說笑話氹身邊人，人緣極好。
但他昨日受訪時謙稱：「其實我冇乜氹女秘技，只係做番自己，真誠對朋友！」又稱沒有用冧功氹未來老婆，反之Keynes無限愛心，親手縫製銀包、皮帶和造生日蛋糕送贈，所謂「幸福親手造」，其真誠再燃起家雄對愛情的希望：「佢係一個不拘小節嘅人，我哋性格好夾，相處開心，咪一齊囉！佢好有心思，親手造好多嘢送畀我，呢份心思先最珍貴，我好感動！」
家雄與第一任妻子所生的兒子韋庭鋒，現年27歲，他稱兒子衷心送上祝福，並與「未來媽媽」相處融洽，相當感恩。問兒子與Keynes夾得嚟？他說：「佢兩個都好夾，我哋一齊飲啤酒，我個仔又帶埋佢女友出嚟，我哋一家四口一齊食飯好開心，今次再婚，我個仔都好支持，仲祝福我添！」
（on.cc）
