前港姐麥明詩（Louisa）一直話題多多，無論喺工作表現或打扮性感啲都會引起熱烈討論，近日更有疑似走光直播片流出，備受壓力嘅佢今日終於爆煲！
佢喺社交網發長文訴心聲，坦言自己只係想做個有正常生活嘅藝人，可以唔顧儀態食嘢同識男仔，當中佢重提參選港姐時不慎走光一事，叫大家喺佢着泳衣時唔使好似驗屍咁驗，最後佢以一句「Please don’t make me see myself as different.（請不要讓我視自己為異類。）」嚟總結，希望大家可以當佢普通人一樣，唔好給予過多注視同壓力。
佢留言謂：「我希望做一個藝人，一個可以掃街搭地鐵擘大口食嘢嘅藝人，一個可以着泳衣但唔使驗屍咁剃到一條毛都冇嘅藝人，一個可以好似正常女仔玩交友app同異性flirt嘅藝人，一個可以嚎啕大哭開懷大笑嘅藝人，一個可以將精神放喺活出充實自在人生嘅藝人，我只希望做一個人。」
(on.cc東網)
