42歲張新悅臨盤在即，不過依然好活躍，完全唔怕辛苦，帶住個巨肚四圍去，早前仲趁端午節遊船河，然後喺社交網貼巨肚相，話要留念一下，因為相信肚皮唔會再有機會咁大。
而噚晚佢就約埋相識18年嘅老友吳佩慈，同埋一位女性友人食飯，吳佩慈仲為佢送上蛋糕，預祝張新悅第四位千金即將出世，張新悅亦有加tag，話倒數9日。
張新悅留言話：「做了三個小孩的媽媽知道時間寶貴，有時有心卻無力。謝謝妳們準備的蛋糕。除了真係好靚好味最重要是百忙還抽空給我這個又有心又有愛的surprise！」而同樣生過三胎、為紀曉波誕下兩子一女嘅吳佩慈，去年6月產B仔後，今年初已事先張揚會再生。不過，噚晚就先同好姊妹預祝就生第四胎。長髮披肩嘅吳佩慈手捧大蛋糕，加上一條超短牛仔褲，39歲嘅佢依然少女味極濃。
今日《蘋果》揾過張新悅，佢話：「約咗成個月，同佩慈好好朋友，以前喺台灣一齊做嘢，另一位係台灣嘅女仔朋友。」張新悅仲自爆，今日以為自己生得，「真係以為生得，點知原來『食詐糊』啫。」
(蘋果日報)
