余文樂上年12月同台灣女星王棠雲結婚，今年5月囝囝余初見(Cody)出世喇！榮升爸爸嘅樂仔今晚終於現身活動，到上環出席手表活動，佢話自己仲係放緊假：「不過呢個job係半年前已經接落，所以一定要出席。我已經放咗1個月假，為咗湊小朋友推晒啲工作，依家努力學習湊BB。」
初為人父嘅樂仔，同老妳分工合作，樂仔笑話自己揀咗個筍位：「我負責餵奶，換片同掃風就係媽咪(老婆)負責，我做夜更，3個鐘餵1次，早更媽咪做。」推咗嘅工作加埋有冇成球呀?樂仔即刻：「點只呀！不過唔關工作事，我係為咗照顧BB，唔想BB一出世，我就去做嘢，想再放多一個月假。」
今個月10號係Cody滿月，問到樂仔會唔會幫囝囝搞百日宴?佢就話唔搞啦，到時只會同屋企人食餐飯。講到囝囝，樂仔就勁開心，仲話Cody路大得好快：「初初出世好細粒，o依家重咗好多，大過張櫈，BB個樣似我，不過媽咪話似佢。」
會唔會再追多個女?樂仔坦言：「想，但有啲驚，想生又唔敢生，因為生女好危險，太太係獨生女，由細到大都唔多朋友。目標係想生3個，睇我能力啦！能力下降咗，因為老囉，湊細路真係好攰，要好多時間，樣樣想自己親力親為，要同老婆輪更湊，工人姐姐只係負責協助。」
樂仔同老婆上年底喺澳洲結婚，佢話唔會喺香港補擺喜酒，之前已經同屋企人食咗飯。至於早前同老婆去咗去意大利旅行，樂仔就自爆本來老婆一直想去意大利結婚，但因為有咗BB，所以就答應老婆擇日再出發：「佢一坐完月我哋就即刻去旅行，不過去到又好掛住BB，好想返屋企，依家手機多好多都係BB嘅相。」
(蘋果日報)
