因節目入屋受到觀眾歡迎，收視成績不錯，主持們都視節目為一塊「肥豬肉」。而該藝人早前亦曾為節目擔任主持，但有指她遭投訴態度差不禮貌，「扮阿姐」拒絕對稿因不合作而被飛出節目。
她接受訪問回應有關傳言，她否認說：「我冇扮阿姐喎！（係咪唔對稿呀？）唔係呀，從來唔會，『阿姐』係家燕姐！話我態度唔好？家燕姐、黎小田同曹永廉（阿廉）可以做人證，如果我同佢哋唔啱，家燕姐娶新抱都唔會請我。」湯記又解釋離開節目全因為與曹永廉拍檔：「本身我同阿廉係一Pair嘅，咁佢要離隊去拍劇，我都做咗呢個節目成年啦，本來我只係做四集咋，無綫想搵番合約藝人陳敏之同胡諾言，加上我又要籌備新歌，所以咪停一停囉。」
傳出負面消息可有不開心？她說：「咁又冇，如果監製再搵我，我時間許可可再合作。」她又說跟節目台前幕後都好好好朋友常約食飯，現時等曹永廉返港，一眾人會再約飯局。
而一直為無綫節目《流行經典50年》擔任主持的薛家燕亦否認：「湯記冇耍大牌，我哋合作得好愉快，佢係要做佢嘅大碟嘢，曹永廉就要拍劇，冇辦法做落去，之前大家都諗唔到做咁耐，所以公司先安排另一Pair主持入嚟。」曹永廉則說：「一定唔會，湯記好好，我哋不知合作得幾開心。」而後來加入的陳敏之則表示未有聽過此傳言：「我只知曹永廉去拍《包青天再起風雲》，湯記我就唔知，可能換就一齊換。」
今早她再於社交網再回應事件，表示已離開該節目三個月：「人在做，天在看！我已經離開三個月了，做這個節目一年多了，真的不明白三個月後拿出來講，還要主持人和工作人員忍受我扮大牌，不對稿一年多 😆真是很荒謬，但多謝家燕姐打來的安慰 阿廉和小田哥的問候。和其他朋友的支持，十分感謝！
（圖片：湯寳如Facebook）
真是做得很開心也捨不得，無論台前幕後工作人員也相處融洽！真心的多謝TVB給我這個機會！ #嘴巴在人家 #我知邊個做 #我信有報應 #冇功都有勞」
（on.cc）
