八和會館主席汪明荃（阿姐）、保良局主席蔡李惠莉今日喺油麻地戲院出席八和課程先導小學粵劇匯演，席上，一班小學生喺台上獻唱粵曲，事後獲阿姐大讚：「睇到佢哋嘅演出，幾意外，有板有眼，咬字好清晰，個音好準，又識聽鑼鼓。」
阿姐透露八和同保良局合作，喺保良局旗下兩間小學推廣小學粵劇課程，每星期上兩小時課程，阿姐表示：「我向佢哋嘅校長提議，係咪可以考慮多少少嘅課時，一星期上得兩個鐘，到下星期都好可能唔記得咗，又要學基本功。」問阿姐當年花幾多時間學粵劇？佢話：「嘩，我40歲先學，點同呀，佢哋得幾歲。（你仲叻？）ok啦我，我係超人！」
阿姐下月將同老公羅家英到俄羅斯睇世界盃決賽，阿姐話：「好期待，今次氣氛好勁，好多冷門球隊表現好積極，比到強隊有啲…美斯慘呀！」
阿根庭今晚有場生死戰？佢即劇好緊張咁問：「對邊隊？尼日利亞？尼日利亞好勁架喎！我有睇嗰場，絕對唔差。」阿姐有咩心水？睇好邊隊？佢指自己脫咗節，所以冇心水：「o依家好多球星我都唔識，都係C朗、美斯，（睇靚仔？）梗係啦，我覺得C朗好完美好正氣，我鍾意C朗冇紋身，好正氣好完美！」
C朗
美斯
（apple daily）
