古語有云：五十知天命。
今日馬德鐘「入伍」，50歲牛一，佢一早就喺facebook貼相收到馬太張筱蘭送嘅靚花，佢拎住花放閃留言：「有其他男士跟我一樣喜歡花嗎？太太就是知道我的心意，在我今天生日的日子，送上清雅的花！感谢太太@江你MarjorieKaren ，同時亦感谢所有给我送上生日祝福的朋友！。」
壽星男新相所見，越嚟越瘦，佢同《蘋果》分享逆齡貼士：「我又開始健康飲食，大部份素食，又做運動。我覺得要食多啲豆類，因為冇吸收動物嘅蛋白補充返，我食多啲堅果同牛油果。」馬德鐘每周都會有規律做gym同游水keep fit。
講到「入伍」，馬德鐘話：「入伍，哈哈，我覺得似重生，就係生命又繼續行，更加健康，工作方面就可更做好啲。人生行咗半，就第二個人生啱啱開始，呢個人生就唔係BB嗰時咁學行，有準備而行係好嘅開始。」問到馬太點同老公慶生？馬太短訊回覆：「平靜渡過。」
(蘋果日報)
