一連落咗好幾日雨，今日終於見到有陽光喇，咁梗係要曬一曬啦！就連「雨神」熊黛林（Lynn），是日都趁住有陽光，帶BB出動曬下啦！仲係第一次帶BB外出添！
Lynn今年4月為郭可頌誕下一對孖女，忙於照顧囡囡嘅Lynn，喺坐月期間都要「出關」去灣仔求醫，原來佢湊B時患上「媽咪手」，雙手臂要用紗布包住。經過調理休養，Lynn慢慢好番，亦開始做運動修身。但係呢，佢都真係幾「黑仔」，兩次出動，兩次都落大雨，第一次，身穿小背心嘅Lynn仲可以selfie出post話：「終於可以做運動了！可是走到一半下大雨了！那就休息一下拍張照片吧。」話口未完，三日後再跑，Lynn又招風雨，今次佢要派嬲了：「才出來五分鐘又下雨，這是幾個意思吖！」
當然都有selfie同tag番自家運動服品牌宣傳下。好不容易今日有太陽，身穿開叉露肩裙，足踏涼鞋嘅Lynn，終於可以同BB外出，一雙長腿已經冇晒水腫，身形回復纖瘦，上圍豐滿。不過相中只見名牌BB車而影唔到BB囉。
要曬一曬嘅仲有三子之母梁洛施。自從宣佈復出之後，剛踏入三十歲嘅梁洛施，連日好勤力咁喺IG出Post谷人氣，唔單止自揭係「豬西妹妹」（佢仲有個「豬西姐姐」），今日新圖再出埋絕招——囝囝出鏡。
其實三個囝囝之前應都有份去佢個「三十而立」生日P，但遮晒樣唔知邊個係，今日梁洛施又再出圖，唔知幾時可以見到「冇格版」嘅「小小超」呢？
(蘋果日報)
